ANG SINUGDANAN SA BASAHON NI PROPETA DANIEL
Dn. 1:1-6, 8-20
Sa ikatulong tuig sa paghari ni Joakim sa Juda, misulong sa Jerusalem si Nabucodonosor, ang hari sa Babilonia. ug gilikosan niya kini. Gitugyan sa Ginoo si Joakim ngadto kang Nabucodonosor uban sa mga galamiton sa Templo sa Dios. Gidala niya kini sa Babilonia, ug gibutang sa templo sa iyang dios, sa tipiganan sa bahandi. Unya gisugo sa hari si Aspenas, ang pangulo sa mga yunoko, sa pagpilig mga batan-ong lalaki nga mga Israelita nga kaliwat sa harianong banay. Kinahanglan nga sila guwapo, maayog panglawas, edukado ug daghag nahibaloan, hait og salabotan, ug may katakos sa pag-alagad sa palasyo. Gisugo usab si Aspenas sa pagtudlo kanila sa pagbasa ug pagsulat sa pinulongan sa mga taga-Babilonia. Adlaw-adlaw gihatagan sila sa hari sa iya gayong kalan-on ug bino. Molungtad og tulo ka tuig ang ilang pagtuon, ug sa pagkatapos nianang panahona, kinahanglang moatubang sila sa hari. Pipila kanilang napili mao si Daniel, si Ananias, si Misael ug si Asarias gikan sa banay ni Juda. Apan si Daniel dili buot nga hugawan niya ang iyang kaugalingon pinaagi sa pagkaon ug pag-inom sa gidulot kaniya; busa gihangyo niya ang pangulo sa mga yunoko nga tugotan siya sa dili pagkaon o pag-inom sa idulot kaniya. Tungod sa panabang sa Dios gikaluy-an si Daniel sa pangulo sa mga yunoko. Apan giingan niya si Daniel, "Nahadlok ako sa akong agalon nga maoy nagbuot sa imong kalan-on ug ilimnon. Kon makakita siya nga mas niwang ka kay sa mga batan-on nga imong katalirongan, mamiligro ang akong kinabuhi." Unya mingon si Daniel sa mayordomo nga gitudlo sa pangulo sa mga yunoko aron mag-atiman kaniya ug sa iyang mga higala, "Sulayi kaming imong mga sulugoon sulod sa napulo ka adlaw; hatagi lamang kamig mga utanon nga among kan-on ug tubig nga among imnon. Unya tandia ang among panagway ug ang panagway sa mga batan-on nga nagkaon sa harianong pagkaon, ug sumala unya sa imong makita buhata kanamo ang imong gusto." Misugot niini ang yunoko. Tapos sa napulo ka adlaw nakita nga mas maayo silag panagway ug mas tambok kay sa tanang batan-on nga mika on sa harianonng kalan-on. Busa wala na sila daliti sa mayordomo ug harianong kalan-on, kondili mga utanon na lamang. Kining upat ka baatn-on gihatagan sa Dios sa tanang kahibalo ug kaalam sa pagsabot sa mga basahon ug si Daniel gihatagan niyag hiyas paghubad sa mga panan-awon ug sa mga damgo. Sa pagkatapos sa tulo ka tuig nga maoy gitagal sa hari nga paatubangon sila kaniya, gidala sila sa pangulo sa mga yunoko ngadto kang Hari Nabucodonosor. Nakigsulti ang hari kanila, ug nakita niya nga walay sama kang Daniel, kang Ananias, kang Misael ug kang Asarias, busa gihimo silang mga alagad sa hari. Ug bahin sa kaalam ug panabot, iyang nakita nga ang ilang kaalam napulo ka pilo kay sa kaalam sa mga salamangkiro Ug sa mga may anting-anting nga sakop sa iyang gingharian.
ANG PULONG SA GINOO.
SALAMAT SA DIOS.
SALMO RESPONSORYO
Dn. 3:52. 53. 54. 55. 56
R. Himaya ug pagdayeg hangtod sa kahangturan!
Daygon ikaw, O Ginoo, Dios sa among mga katigulangan, angay ikawng daygon ug bayawon labaw sa tanan sa kahangturan; Ug daygon ang imong balaan ug mahimayaong ngalan, angayng daygon ug bayawon labaw sa tanan sa tanang katuigan. (R)
Daygon ikaw diha sa templo sa imong balaang himaya, angay ikawng daygon ug bayawon labaw sa tanan sa kahangturan. Daygon ikaw diha sa trono sa imong gingharian, angay ikawng daygon ug bayawon labaw sa tanan sa kahangturan. (R)
Daygon ikaw nga nagadung-aw ngadto sa mga kahiladman gikan sa imong trono diha sa mga kerubin, angay ikawng daygon ug bayawon labaw sa tanan sa kahangturan. (R)
Daygon ikaw diha sa ali sa kalangitan, angay ikawng daygon ug bayawon labaw sa tanan sa kahangturan. (R)
PAGBASA SA SANTOS NGA EBANGHELYO SUMALA NI SAN LUKAS
Lk. 21:1-4
Nakita ni Jesus ang mga dato nga nanghulog sa ilang mga gasa sa panudlanan sa Templo. Nakita usab niya ang usa ka biyuda nga kabus kaayo nga naghulog og duha ka dako, ug mingon si Jesus, "Sultihan ko kamo nga kining kabus nga biyuda labaw gayod ug gikahatag kay kanilang tanan. Kay ang uban naghalad man sa ilang mga gasa nga sobra na sa ilang bahandi, apan siya, bisan pa sa iyang kakabus, mihatag sa tanan nga iyang gikabuhian."
ANG EBANGHELYO SA GINOO.
DAYGON IKAW, O KRISTO.
