KINUTLO GIKAN SA UNANG BASAHON SA MACABEO
1 Mc. 6:1-13
Samtang si Hari Antioco IV milabay sa Mesopotamia, nakadungog siva mahitugnod sa usa ka siyudad didto sa Persia, nga gihinganlan ug Elymais nga gibantog sa iyang kadato sa plata ug bulawan. Ang templo bahandianon kaayo, may mga taming nga bulawan, kotamaya, ug mga hinagiban nga gibilin didto ni Alejandro, anak sa hari nga si Felipe sa Macedonia, mga mao ang unang naghari sa emperyong Griego. Miabot si Antioco ug misulay sa pag-ilog sa siyudad ug pagpanakmit sa mga butang niini, apan wala siya molampos, tungod kay ang mga lungsoranon nasayod man sa iyang gilaraw nga buhaton, ug nagtigom sila sa ilang mga kasundalohan aron pagsukol kaniya. Sa dako niyang kahiubos misibog siya aron pagbalik ngadto sa Babilonia. Didto sa Persia usa ka sinugo miabot kaniya nga nagdala sa balita nga ang mga kasundalohan nga iyang gipadala ngadto sa Judea naparot. Si Lisias ug ang iyang kusganon nga kasundalohan napugos sa pagsibog gikan sa mga Judio, nga gilig-on na karon sa dugang nga mga hinagiban, kahimanan, ug mga sinakmit nga ilang nakuha gikan sa gibuntog nilang kasundalohan. Giguba sa mga Judio ang butang nga gihinganlan nilag "Ang Makalilisang nga Talan-awon" nga gitukod ni Antioco ibabaw sa altar sa Jerusalem. Gilibotan usab nila ang Templo ug tag-as nga mga paril, ingon sa kaniadto, ug gikuha nila uggibutangag mga kota ang lungsod sa Betzur, usa sa mga lungsod nga kaugalingon sa hari. Sa pagkadungog sa hari niining maong taho, nakugang siya ug wala makatingog nga sa ingon mihigda siya nga gisapot pag-ayo tungod kay maong mga butang wala matuman sumala sa iyang gilauman. Nagpabilin siya nga masakiton sa hataas nga panahon, sa diha nga ang mga balaod sa kawalay paglaum mibanlas kaniya hangtod nga sa katupusang nakaamgo siya nga hapit na siya mamatay. Gitigom niya silang tanan nga gihatagan niya sa titulo "Mga Higala sa Hari" ug giingnan niya sila, "Dili ako makakatulog, ug naguol ako ug nabalaka. Sa sinugdan nangutana ako sa akong kaugalingon ngano nga kining dagkong mga balod sa kagul-anan mibanlas man kanako, nga unta maluluy-on man ako ug higustohan pag-ayo sulod sa akong pagkahari. Apan unya nahinumdom ako sa mga kasaypanan nga akong nahimo didto sa Jerusalem diha sa akong pagkuha sa tanan nga mga butang nga plata ug bulawan gikan sa Templo ug misulay ako sa walay maayong katarungan sa paglaglag sa mga lumolupyo sa Judea. Nasayod ako nga mao kini ang katarungan ngano nga kining tanan nga makalilisang nga mga butang nahitabo kanako ug ako hapit na mamatay sa pagkawalay paglaum dinhi niining yuta nga langyaw."
ANG PULONG SA GINOO.
SALAMAT SA DIOS.
SALMO RESPONSORYO
Ps. 9:2-3, 4, 6, 16, 19
R. Magsadya ako sa imong kaluwasan, O Ginoo.
Pasalamatan ko ikaw, Ginoo, sa tibuok kong kasingkasing; ipadayag ko ang tanan mong katingalahang mga buhat. Maglipay ako ug magsadya diha kanimo; awitan kog pagdayeg ang imong ngalan, O Labing Hataas. (R)
Kay ang akong mga kaaway napabalik, nagalimbuwad ug nalaglag sa imong atubangan. Gibadlong mga ang kanasuran ug gilaglag mo ang mga dautan; gipapas mo ang ilang mga ngalan hangtod sa kahangturan. (R)
Sa lit-ag nga ilang giladlad, nabitik ang ilang tiil; kay an hangol dili kanunay hikalimtan, ni ang kalauman sa naguol mahanaw sa kahangturan. (R)
PAGBASA SA SANTOS NGA EBANGHELYO SUMALA NI SAN LUKAS
Lk. 20:27-40
May mga Saduseo nga miduol kang Jesus. (Kini sila mao ang nag-ingon nga ang mga patay dili mabanhaw.) Nangutana sila kaniya, "Magtutudlo, nagsulat si Moises niining balaod alang kanato: 'Kon ang usa ka tawo mamatay ug may asawa nga nahibilin apan walay anak, ang igsuon niadtong tawhana kinahanglan mangasawa sa biyuda aron manganak sila alang sa namatay.' May pito ka magsuong lalaki, ang kamagulangan naminyo ug namatay nga walay anak. Unya ang ikaduhang igsuon nangasawa sa biyuda, ingon man ang ikatulo, hangtod nga ang pito ka magsuon nakapangasawa sa babaye ug nangamatay silang tanan nga walay anak. Sa katapusan ang babaye maoy namatay. Karon, sa adlaw nga banhawon na ang mga patay, kinsa man siyang asawa nga silang tanan nakapangasawa man kaniya?" Si Jesus mitubag kanila, "Ang mga lalaki ug babaye niining panahona nagminyoay, apan ang mga lalaki ug babaye nga angay banhawon ug magkinabuhi sa umaabot nga panahon dili na magminyoay. Sama sila sa mga anghel ug dili na mamatay. Mga anak sila sa Dios kay gibanhaw man sila. Ug gitin-aw gayod ni Moises ang pagmatuod nga banhawon ang mga patay. Sa bahin nga nagsaysay mahitungod sa sampinit nga nagdilaab, naghisgot siya mahitungod sa Ginoo nga mao 'ang Dios ni Abraham, Dios ni Isaac, ug Dios ni Jacob.' Kini nagpasabut nga siya mao ang Dios sa mga buhi ug dili sa mga patay kay alang kaniya ang tanan buhi." Pipila sa mga magtutudlo sa Balaod miingon, "Maayong pagkatubag, Magtutudlo!" Ug wala na sila mangahas pagpangutana kang Jesus.
ANG EBANGHELYO SA GINOO.
DAYGON IKAW, O KRISTO.
