KINUTLO GIKAN SA UNANG BASAHON SA MACABEO
1 Mc. 4:36-37, 52-59
Si Judas ug ang iyang mga igsuon nga lalaki nag-ingon, "Karon nga ang atong mga kaaway nabuntog na, mangadto kita sa Jerusalem aron paglinis sa Templo ug sa pagbag-o sa paghalad niini." Busa ang tibuok kasundalohan gitigom ug mitungas ngadto sa Bukid sa Sion. Ang ikakawhaag-lima ka adlaw sa ikasiyamn nga bulan sa Kisleb sa tuig usa ka gatos ug kap-atag-walo mao ang kasumaran sa adlaw nga gipanamastamasan sa mga dili Judio ang altar. Niadtong adlawa gihalad ang usa ka sakripisyo ibabaw sa bag-ong altar subay sa Balaod ni Moises. Ang bag-ong altar gihalad ug mga alawiton giawit dinuyogan sa mga alpa, plawta ug piyangpiyang. Ang tanang mga tawo miyukbo uban sa ilang mga dinuko nga mga nawong ngadto sa yuta ug gisimba nila ug gidayeg ang Ginoo tungod sa paghatag niya kanila ug kadaogan. Sulod sa walo ka adlaw gisaulog nila ang bag-ong paghalad sa Templo. Uban sa dakong kasadya gidala nila ang Sinunog nga mga halad ug gihalad ang mga halad sa panghigalaay ug ang mga halad sa pasalamat. Gidayandayanan nila ang atubangan sa Templo ug mga korona ug mga taming nga bulawan, gibag-o nila pagtukod ang mga ganghaan, ug ang mga lawak sa mga pari ug gibutangan nila kini ug mga sira. Karon nga gikuha na sa mga Judio ang kaulawan nga nadala sa mga dili Judio, naghimo sila ug usa ka dakong kasaulogan. Unya si Judas, ang iyang igsuong mga lalaki ug ang tibuok katilingban sa srael nagbaod nga ang pagbag-o sa pahalad sa Templo kinahanglan saulogon uban sa usa ka pangilin sa kasadya ug kalipay sa samang panahon matag tuig, sugod sa ikakawhaag-lima sa bulan sa Kisleb ug nga molungtad kini sulod sa walo ka adlaw.
ANG PULONG SA GINOO.
SALAMAT SA DIOS.
SALMO RESPONSORYO
1 Chr. 29:10, 11, 11-12, 12
R. Nagadayeg kami sa imong mahimayaong ngalan, O Dios nga gamhanan.
Daygon ka unta, O Ginoo, Dios ni Israel among Amahan, gikan sa kahangturan ngadto sa kahangturan. (R)
Imo, O Ginoo, ang kaharianon; gibayaw ka nga pangulo labaw sa tanan. Ang kabahandianon ug kadungganan nagagikan kanimo. (R)
Ug ikaw ang nagmando diha sa tanan, sa imong kamut anaa ang gahom ug kusog; ikaw ang naghatag sa kadako ug kusog ngadto sa tanan. (R)
PAGBASA SA SANTOS NGA EBANGHELYO SUMALA NI SAN LUKAS
Lk. 19:45-48
Si Jesus misulod sa Templo ug gi-abog niya ang mga nagpatigayon didto; ug giingnan niya sila, "Nahisulat sa Kasulatan nga ang Dios nag-ingon, 'Ang akong balay tawgon nga balay-alampoanan,' apan gihimo ninyo kini nga taguanan sa mga tulisan!" Si Jesus nagtudlo didto sa Templo sa matag adlaw. Ang mga kadagkoan sa mga pari, ang mga magtutudlo sa Balaod, ug ang mga pangulo sa mga tawo buot mopatay kaniya, apan wala silay nahimo tungod kay ang tanang tawo nagpadayon man pagpamati sa tanan niyang gisulti.
ANG EBANGHELYO SA GINOO.
DAYGON IKAW, O KRISTO.
