KINUTLO GIKAN SA UNANG BASAHON SA MACABEO
1 Mc. 2:15-29
Unya ang mga opisyal sa hari, nga nagpugos sa mga tawo sa pagtalikod sa Dios, miabot sa lungsod sa Modin aron pagpugos sa mga tawo didto sa paghalad sa mga sakripisyo nga pagano. Daghan sa mga Israelita misugat kanila, lakip si Matatias ug ang iyang mga anak nga lalaki. Ang mga opsyal sa hari namulong kang Matatias, "Ikaw usa ka tinahod nga pangulo niining lungsora, ug ikaw gipaluyohan sa imong mga anak ug mga paryenti. Nganong dili ka man mag-una dinhi sa pagbuhat sa gisugo sa hari? Ang tanang mga dili Judio, ang katawhan sa Judea ug ang tanang mga tawo nga nahabilin sa Jerusalem naghimo na niini. Kon magbuaht ka niini, ikaw ug ang imong mga anak pasidunggan sa titulo nga 'Mga Higala sa Hari,' ug gantihan ikaw sa plata ug bulawan ug sa daghan nga mga gasa." Si Matatias mitubag sa makusog nga tingog, "Dili ko igsapayan kon ang tanang dili Judio niining enmperyo magtahod sa hari ug motuman sa sugo sa pagbiya sa relihiyon sa iyang mga katigulangan. Ang akong mga anak, ang akong mga paryeti ug ako magpadayon sa pagtuman sa kasabotan nga gihimo sa Dios uban sa among mga katigulangan. Uban sa panabang sa Dios dili gayod kami mobiya sa iyang Balaod ni mosupak sa iyang mga sugo. Dili kami motahod sa kasugoan sa hari, ug dili namo balhinon ang among paagi sa pagsimba bisan sa labing gamay." Igo siya nahuman sa pagsulti, usa sa mga lalaki nga gikan sa Modin mihukom sa pagtahod sa kasugoan sa hari ug milakang atubangan sa tanan aron paghalad og usa ka sakripisyo nga pagano ibabaw sa altar nga nagbarog didto. Sa pagkakita ni Matatias kaniya, nasuko siya pag-ayo, ug sa iyang kasuko gibuhat niya ang angay buhaton. Mikurog sa kapungot, midagan siya ug gipatay niya ang tawo didto gayod sa altar. Gipatay usab niya ang opisyal sa hari nga nagpugos sa mga tawo sa pagsakripisyo, ug unya iyang giguba ang altar. Niining paagiha gipaktia ni Matatias ang iyang halawon nga gugma alang sa Balaod, maingon sa gibuhat ni Pinehas o sa iyang pagpatay kang Zimri, anak nga lalaki ni Salu. Unya si Matatias milatas sa lungsod ug misinggit, "Kamong tanan nga matinumanon sa kasabotan sa Dios ug nagsugot sa iyang Balaod, sunod kamo kanako!" Human niini, siya ug ang iyang mga anak mikagiw ngadto sa kabukiran ug gibiyaan nila ang tanan nga ilaha. Niadtong panahona usab daghan sa mga Israelita, nga nangita sa pagkamatarong atubangan sa Dios pinaagi sa pagtahod sa Balaod, nanlakaw aron adto magpuyo sa kamingawan.
ANG PULONG SA GINOO.
SALAMAT SA DIOS.
SALMO RESPONSORYO
Ps. 50:1-2, 5-6, 14-15
R. Sa matarong ipakita ko ang makaluluwas nga gahom sa Dios.
Ang Ginoong Diosmisulti ug gitawag niya ang yuta, gikan sa pagsubang sa adlaw hangtod sa iyang pagsalop. Gikan sa Sion, hingpit sa katahum, nagasidlak ang Dios. (R)
"Pagtapok kamo, mga buotan ko, sa akong atubangan, kamong nakigsabot kanako pinaagi sa sakripisyo." Ug ang mga langit magasangyaw sa iyang katarong; kay ang Dios mismo mao man ang maghuhukom. (R)
"Ihalad ngadto sa Dios ang pagdayeg agig imong sakripisyo ug tumana ang imong mga panaad ngadto sa Labing Hataas. Unya sangpita ako sa panahon sa kagul-anan luwason ko kamo, ug himayaon ako ninyo." (R)
PAGBASA SA SANTOS NGA EBANGHELYO SUMALA NI SAN LUKAS
Lk. 19:41-44
Nagkaduol na si Jesus sa siyudad ug sa iyang pagkakita niini, mihilak siya, ug miingon, "Kon nasayod ka pa unta karong adlawa kon unsa ang gikinahanglan alang sa kalinaw! Apan karon dili ka makakita niini! Kay moabot ang mga adlaw nga likosan ka sa imong mga kaaway ug alihan ka ug atakihon nila sa tanang dapit. Gun-obon ka sa hingpit ug laglagon ang mga tawo nga nagpuyo diha kanimo; walay usa ka bato nga ibilin nila sa nahimutangan niini, kay wala nimo ilha ang panahon sa pag-anhi sa Dios aron pagluwas kanimo."
ANG EBANGHELYO SA GINOO.
DAYGON IKAW, O KRISTO.
