🟢 Miyerkoles sa Ikakatloa'g Tulo nga Semana sa Tuig

KINUTLO GIKAN SA IKADUHANG BASAHON SA MACABEO

2 Mc. 7:1, 20-31

Sa laing higayon may usa ka inahan nga Judio ug ang iyang pito ka anak nga lalaki nga gidakop. Gipabunalan sila sa hari aron pagpugos kanila sa pagkaon og baboy. Ang inahan mao ang labing katingalahan kanilang tanan, ug angay siya sa usa ka linain nga luna sa atong handumanan. Bisan nagtan-aw siya nga nagpakamatay ang iyang pito ka anak sulod sa usa ka adlaw, giantos niya kini sa dako nga kaisog tungod kay misalig siya sa Ginoo. Gidugtong niya ang pagbati sa usa ka babaye ug ang kaisog sa usa ka lalaki ug misulti siya sa mga pulong sa pagdasig sa tagsatagsa niya ka mga anak diha sa ilang kaugalingong sinultihan. Miingon siya, "Wala ako mahibalo giunsa pagsugod ang inyong kinabuhi dinhi sa akong tagoangkan. Dili ako mao ang naghatag kaninyog kinabuhi ug gininhawa ug nagpahimutang sa matag bahin sa inyong lawas. Ang Dios mao ang nagbuhat niini, ang Dios nga nagbuhat sa tanang kalibutan, ang kaliwat sa mga tawo ug sa tanan nga ania. Siya maluluy-on ug hatagan kamo niya pagbalik sa kinabuhi ug sa gininhawa tungod kay gihigugma ninyo ang iyang mga balaod labaw kay sa inyong paghigugma sa inyong kaugalingon." Naseguro si Antioco nga gitiawtiawan siya sa inahan, busa gihimo niya kutob sa iyang mahimo ang pagdani sa kamanghurang anak sa inahan sa pagbiya sa mga tradisyon sa iyang mga katigulangan. Iya siyang gisaaran dili lamang paghimo sa bata nga dato ug bantog kondili sa pagbutang sa bata sa usa ka luna sa awtoridad ug paghatag niya sa titulo sa "Higala sa Hari." Apan ang bata wala magtagad kaniya, busa si Antioco misulay sa pagbuyo sa inahan sa bata aron sultihan siya nga luwason unta ang iyang kinabuhi, ug human sa daghang pagdasig miuyon angi inahan sa paghimo niini. Mitikubo siya ngadto sa iyang anak, gilansisan niya ang pintas nga hari pinaagi sa pagpamulong sa iyang kaugalingong sinultihan sa pag-ingon, "Anak ko, kaloy-i ako, hinumdomi nga gidala ko ikaw sulod sa akong tagoangkan sa sivam ka bulan ug gimatuto ko ikaw sulod tulo ka tuig. Gialimahan ko ikaw ug nag-atiman ako sa tanan nimong mga kinahanglan hangtod karong adlawa. Busa awhagon ko ikaw, anak ko, sa pagtan-aw sa langit ug sa yuta. Palandonga ang tanan nga imong nakita didto ug matngoni nga ang Dios maoy naghimo niining tanan gikan sa wala, maingon nga iyang gibuhat ang kaliwat sa mga tawo. Ayaw kahadlok niining matadero. Ihatag ang imong kinabuhi sa maayong kabubut-on ug matuora ang imong kaugalingon nga takus ikaw sa imong mga igsuon, aron tungod sa kaluoy sa Dios, dawaton ko ikaw pagbalik uban kanila didto sa pagkabanhaw." Sa wala pa siya makahuman pagsulti, ang bata miingon, "Hari Antioco, unsa may imong gihulat? Nagdumili ako sa pagsugot sa imong mga sugo. Ang akong sugton mao lamang ang mga sugo Sa Balaod nga gihatag ni Moises ngadto sa among mga katigulangan. Gihunahuna nimo ang tanang matang sa mapintas nga mga butang nga imong pagabuhaton alang sa among katawhan, apan dili ikaw makalingkawas sa silot nga giandam sa Dios alang kanimo."

SALMO RESPONSORYO

Ps. 17:1, 5-6, 8, 15

R. Ginoo, inigpakita sa imong himaya, mahingpit ang akong kalipay.

Pamati-a, Ginoo, ang usa ka matarong nga hangyo; patalinghugi ang akong panaliya; dungga ang akong mga pangamuyo nga gikan sa mga ngabil nga walay limbong. (R)

Ang akong mga lakang malig-on diha sa imong mga agianan, ang akong mga tiil wala masayop. Tawgon ko ikaw, kay patalinghugan mo man ako, O Dios; ipaabong ang imong dunggan kanako; pamati-a ang akong pulong. (R)

Tagoi ako diha sa landong sa imong mga pako. Makatarunganon nga mosud-ong ako sa imong nawong; sa akong pagmata, malipay ako diha sa imong atubangan. (R)

PAGBASA SA SANTOS NGA EBANGHELYO SUMALA NI SAN LUKAS

Lk. 19:11-28

Unya misugilon si Jesus og usa ka sambingay ngadto sa nakadungog niini. Niadtong tungora hapit na si Jesus moabot sa Jerusalem, ug naghunahuna ang mga tawo nga hapit na mopakita ang Gingharian sa Dios. Busa miingon siya, "May usa ka tawo nga harianon nga miadto sa usa ka layong nasod aron himoong hari, ug unya mnopauli siya sa ila. Sa wala pa siya mogikan, gipatawag niya ang iyang napulo ka sulugoon, ug gihatagan niya ang tagsatagsa kanila og kuwartang bulawan ug giingnan sila, 'Ipatigayon ninyo kini samtang wala ako dinhi.' Apan gikasilagan siya sa iyang mga katagilungsod, busa nagsugo silag mga tawo pag-apas kaniya aron sa pag-ingon, 'Dili kami gusto nga kining tawhana maoy maghari kanamo.'" "Apan siya nahimo gayong hari ug unya mipauli. Ug gipatawag dayon niya ang iyang mga sulugoon nga gihatagan niyag kuwarta aron hisayran niya pila ang ilang ganansiya. Ang una miadto ug miingon, 'Sir, nakaganansiya akog napulo gikan niadtong puhonan nga imong gihatag kanako.' Ug miingon ang tawong halangdon, 'Maayo, buotan ka nga sulugoon! Sanglit kasaligan ka man Sa gagmayng mga butang, piyalan ko ikaw sa napulo ka siyudad.' Miadto usab ang ikaduhang sulugoon ug miingon, 'Sir, nakaganansiya akog lima gikan sa puhonan nga imong gihatag kanako.' Ang agalon miingon kaniya: 'Piyalan ko ikaw sa lima ka siyudad.' Ug ang ikatulong sulugoon miadto kaniya ug miingon, 'Sir, ania ang imong kuwartang bulawan; giputos ko gayod kini sa panyo, kay nahadlok ako kanimo, tungod kay ikaw estrikto ra ba kaayo. Nagkubha ka sa dili imo, ug nag-ani sa wala nimo ipugas.' Ug miingon siya sa iyang sulugoon: 'Wala kay hinungdan! Gamiton ko ang imong kaugalingong mga pulong sa paghukom kanimo. Nasayod ka man diay nga ako estrikto kaayo, nagkuha sa dili ako ug nag-ani sa wala ko ipugas, ngano nga ang akong kuwarta wala mo man idepostio sa bangko? Madawat ko unta kini nga may tubo sa akong pagbalik.' Unya miingon siya niadtong nagtindog didto, 'Kuhaa kanang kuwarta nga anaa kaniya ug ihatag ngadto sa sulugoon nga may napulo ka kuwartang bulawan.' Miingon sila kaniya, 'Apan Sir, duna na siyay napulo ka kuwartang bulawan!' Unya mitubag siya, 'Sultihan ko kamo nga ang tanan nga anaay iya dugangan, apan siya nga wala gayoy iya, bisan pa ang diyotay nga anaa kaniya kuhaon pa gayod. Nan, karon mahitungod sa akong mga kaaway nga dili gusto nga ako maghari kanila, dad-a sila dinhi ug pamatya sa akong atubangan.'" Si Jesus misulti niini ug unya mipadayon siya ngadto sa Jerusalem nga nag-una kanila.