KINUTLO GIKAN SA IKADUHANG BASAHON SA MACABEO
2 Mc. 6:18-31
May usa ka gulanggulang na ug tinahod kaayo nga magtutudlo sa Balaod nga ginganlan og Eleazar, kansang ba-ba gipugos sa pagpanganga aron mokaon siya ug baboy. Apan gipalabi niya ang usa ka dungganan nga kamatayon kay sa usa ka kinabuhi sa kaulawan. Busa giluwa niya ang karne ug miadto siya nga mahinangpon sa dapit nga pagasakitan, gipakita niya unsaon sa usa ka tawo sa pagbaton sa kaisog aron pagdumili sa mga pagkaon nga mahugaw, bisan kon kini pagabayran nila sa ilang kinabuhi. Ang mga lalaki nga maoy nagdumala sa sakripisyo mga higala kanhi ni Eleazar sulod sa hataas nga panahon, ug tungod niining panaghigalaay giingnan siya nila sa tago sa pagdala og karne nga mahimo niya pagkaon subay sa balaod. Igo lamang siya nagpakaaron-ingon nga mikaon ug baboy, miingon sila, ug niining paagiha dili siya patyon. Apan si Elazar mihimog usa ka hukom nga takos sa iyang ubanon nga buhok ug sa iyang kagulangon. Tibuok niyang kinabuhi nagpuyo siya diha Sa hingpit nga pagsugot sa mga balaan nga balaod sa Dios, busa mitubag siya, "Patya ako, karon dayon. Ang maong paglimbong dili angay sa usa ka tawo nga may panuigon sama sa ako. Daghang mga batan-on maghunahuna unya nga nangulipas ako sa akong pagtuo human sa akong kasiyaman ka tuig nga panuigon. Kon magpatusotuso ako nga mikaon niining unod, aron lamang magpuyo og dugang nga diyotayng panahon, kini magdala kanakog kaulawan ug magpahisalaag sa daghang mga batan-on. Sa pakakaron mahimo tingali nga makalingkawas ako sa inyong pagabuhaton kanako, apan mabuhi akoo mamatay dili ako makalingkawas sa Dios nga Makagagahum sa nga tanan. Kon mamatay ako karon nga maisugon, kini magpakita nga angay ako sa akong taas nga kinabuhi. Kini magbutang usab og usa ka maayong panig-ingnan sa paagi nga ang mga batan-on kinahanglan andam ug malipayon sa pagpakamatay alang sa atong balaan ug tinuod nga mga balaod." Sa pagkahuman niyag sulit niining mga butanga, miadto siya aron sakiton ug ang maong mga tawo nga nagtratar kaniya nga maluluy-on pipila ka gutlo una pa kini mahitabo, karon mibatok kaniya, tungod kay naghunahuna sila nga siya nagsulti ingon og usa ka tawo nga buang. Human nila siya bunali nga hapit na siya mamatay, miagulo siya ug miingon, "Ang Ginoo nagbaton sa tanang balaan nga kahibalo. Nahibalo siya nga makalingkawas unta ako niining makalilisang nga alantuson ug kamatayon, apan bisan pa niana, siya nahibalo usab nga malipayon ako nga nag-antos niining mga butanga tungod kay nahadlok ako kaniya." Busa namatay si Eleazar. Apan ang iyang maisugon nga kamatayon gihandom ingon og usa ka mahimayaon nga panig-ingnan dili lamang sa mga batan-on kondili usab sa tibuok nga nasod.
ANG PULONG SA GINOO.
SALAMAT SA DIOS.
SALMO RESPONSORYO
Ps. 3:2-3, 4-5, 6-8
R. Ang Ginoo nagalig-on kanako.
O Ginoo, pagkadaghan sa akong mga kaaway! Daghan ang nag-ingon kanako! Daghan ang nag-ingon kanako, "Walay kaluwasan alang kaniya diha sa Dios." (R)
Apan ikaw, O Ginoo, mao ang akong taming; akong himaya, imong gibangon ang akong ulo. Sa pagsangpit ko sa Ginoo, iya akong gitubag gikan sa iyang balaang bukid. (R)
Sa paghigda ko diha sa pagkatulog, nahigmata ako, kay ang Ginoo nagalig-on kanako. Wala ako mahadlok sa daghanan nga mga tawo nag nagalaray batok kanako sa tanang kiliran. Tindog, O Ginoo, luwasa ako, Dios ko! (R)
PAGBASA SA SANTOS NGA EBANGHELYO SUMALA NI SAN LUKAS
Lk. 19:1-10
Si Jesus mipadayon ngadto sa Jerico ug samtang miagi siya, may usa ka dato nga ginganlag Saqueo, nga pangulo sa mga kobrador sa buhis, nga naninguha pagtan-aw kon kinsa siya. Apan mubo si Saqueo ug wala siya makakita kang Jesus tungod sa panon sa mga tawo. Busa midagan siya una sa panon ug misaka sa kahoyng sikomoro, aron makakita siya kang Jesus nga moagi niadtong dalana. Sa pag-abot na ni Jesus niadtong dapita, mihangad siya sa kahoy ug miingon kang Saqueo, "Kanaog dayon, Saqueo, kay adto ako moabot sa imong balay karong adlawa." Mikanaog si Saqueo pagdali ug sa dakong kahinangop midawat kang Jesus. Ang tanan nga nakakita niini nagbagulbol, "Kining tawhana namisita sa balay sa usa ka makasasala!" Ug mitindog si Saqueo ug miingon sa Ginoo, "Sir, paminaw! Ihatag ko ang katunga sa akong katigayonan ngadto sa mga kabus, ug kon ako nakalimbong kang bisan kinsa, ulian ko siyag upat ka pilo." Si Jesus miingon kaniya, "Karong adlawa miabot ang kaluwasan niining balaya, kay kining tawhana kaliwat usab ni Abraham. Kay mianhi ang Anak sa Tawo aron sa pagpangita ug pagluwas sa nawala."
ANG EBANGHELYO SA GINOO.
DAYGON IKAW, O KRISTO.
