⚪ [M] Santa Isabel sa Hungaria, relihiyosa

KINUTLO GIKAN SA UNANG BASAHON SA MACABEO

1 Mc. 1:10-15, 41-43, 54-57, 62-63

Ang dautang hari nga si Antioco Epifanes, anak ni Hari Antioco III sa Siria, maoy usa ka kaliwat sa usa sa mga heneral ni Alejandro. Si Antioco Epifanes nahimong usa ka patinga nga priso didto sa Roma sa wala pa siya mahimong hari sa Siria sa tuig usa ka gatos ug katloag-pito. Niadtong panahona may mitungha didto sa yuta sa Israel nga usa ka pundok sa mga mabudhion nga mga Judio nga walay pagtagad sa Balaod ug maoy nagdaldal sa daghan sa among katawhan. Miingon sila, "Makigsabot lang kita sa mga dili Judio kay ang atong pagdumili sa pagpakig-abin kanila walay kaayohan nga midangat kanato kondili kagubot." Kining hunahunaa giuyonan sa daghang mga tawo, ug ang uban kanila hilabihan kadasig mahitungod niini nga miadto sila sa hari ug nakadawat gikan kaniya ug pagtugot aron magsunod sila sa mga batasan sa mga dili Judio. Nagtukod sila didto sa Jerusalem ug usa ka estadyum sama niadtong didto sa mga siyudad nga Griego. Nagpaopera sila aron pagtago sa ilang pagkatinuli, ug gibiyaan nila ang balaan nga kasabutan, ug nakig-uban-uban sila sa mga dili Judio ug naghimo sila sa tanang matang sa dautan. Unya si Antioco nagpakanaog ug usa ka kasugoan nga ang tanang mga nasod sa iyang emperyo kinahanglan mobiya iyang kaugalingong mga batasan ug kinahanglan mahimong usa ka katawhan. Ang tanang mga dili Judio ug bisan daghan sa mga Israelita miduko niining kasugoana. llang gisunod ang relihiyon opisyal nga pagano ug naghalad silag mga sakripisyo ngadto sa mga diosdios ug wala na sila magtuman sa Adlaw nga Igpapahulay. Sa ikanapulog-lima ka adlaw sa bulan sa Kisleb sa tuig usa ka gatos ug kapatag-lima, si Hari Antioco nagbutang sa "Ang Makalilisang nga Talan-awon" dito sa altar sa Templo, ug gitukod ang mga altar nga pagano didto sa mga lungsod sa tibuok nga Judea. Gihalad ang mga sakripisyo nga pagano atubangan sa mga kabalayan ug didto sa mga kadalanan. Ang bisan unsang mga basahon sa Balaod nga hikaplagan gigisi ug gisunog. Ug bisan kinsa nga hisakpan nga nagdala ug usa ka hulad sa balaan nga mga basahon o nagtuman sa mga Balaod gipapatay sa sugo sa hari. Apan daghang mga tawo sa Israel malig-ong misukol sa kasugoan sa hari ug nagdumili sa pagkaon sa kalan-on nga mahugaw sumala sa seremonyas. Gipalabi nila ang pagpakamatay kay sa pagsupak sa balaan nga kasabutan ug sa pagkaon sa dili malinis nga kalan-on—ug daghan ang namatay.

SALMO RESPONSORYO

Ps. 119:53, 61, 134, 150, 155, 158

R. Tagai akog kinabuhi, Ginoo, ug tumanon ko ang imong kasugoan.

Puno ako sa kalagot tungod sa tawo nga dautan nga mibiya sa imong balaod. (R)

Bisan nagapos ako sa lig-ag sa dautan, wala nako hikalimti ang imong balaod. (R)

Luwasa ako sa daugdaog sa mga tawo, aron bantayan ko ang imong mga sugo. (R)

Gihasmagan ako sa mga dautang mangugukod nga halayo sa imong balaod. (R)

Ang kaluwasan halayo ra sa mga makasasala, kay wala sila mangita sa imong mga kasugoan. (R)

Giluod ako pagtan-aw sa mga mitalikod kanimo, kay wala man nila bantaye ang imong saad. (R)

PAGBASA SA SANTOS NGA EBANGHELYO SUMALA NI SAN LUKAS

Lk. 18:35-43

Sa nagkaduol na si Jesus sa Jerico, may usa ka buta nga naglingkod ug nagpakilimos diha sa daplin sa dalan. Sa pagkadungog niya sa paglabay sa panon sa mga tawo, nangutana siya, "Unsa ba kini?" "Si Jesus nga taga Nazaret milabay," miingon sila kaniya. Unya misinggit siya, "Jesus! Kaliwat ni David! Kaloy-i intawon ako!" Tungod niini gikasab-an siya sa mga tawo nga nag-una ug gipahilom siya. Apan mikusog hinoon siya pagsinggit, "Kaliwat ni David! Kaloy-i intawon ako!" Busa mihunong si Jesus ug misugo nga ang buta dad-on ngadto kaniya. Sa nahiduol na siya, nangutana si Jesus kaniya, "Unsa may buot mong buhaton ko alang kanimo?" Mitubag siya, "Sir, gusto unta ako nga makakita pag-usab." Ug giingnan siya ni Jesus, "Makakita ka! Ang imong pagtuo maoy nakaayo kanimo." Ug dihadiha nakakita siya ug misunod kang Jesus ug nagpasalamat sa Dios. Sa pagkakita niini sa mga tawo, midayeg silang tanan sa Dios.