KINUTLO GIKAN SA BASAHON SA KAALAM NI SOLOMON
Wis. 18:14-16; 19:6-9
Katunga pa lamang ang miagi sa mubo nga gabii, ug ang tanan namingaw na ug nalinaw, ug sa kalit natuman ang imong mga hulga! Usa ka dili mabangbang nga pulong sa hukom migula nga makusog gikan sa imong harianong trono sa langit, nanaog dayon ngadto niadtong sinilotan nga yuta. Miabot kini ingon og usa ka sundalo diha sa usa ka makalilisang nga paghasmag, nagtuman sa imong malig-on nga mga sugo ginamit ang usa ka makalilisang nga hinagiban, nagtindog nga ang iyang mga tiil diha sa yuta ug ang iyang ulo miabot sa kapanganuran, ug gipuno sa kamatayon ang yuta. Ang tibuok kinaiyahan sa uniberso nausab pinaagi sa imong sugo aron ang imong katawhan dili madaot. Nakakita sila sa panganod ibabaw sa ilang kampo ug sa uga nga yuta diin kanhi adunay tubig. Adunay patag nga binakbakan sa balili nga nag-ulang sa maggubot nga mga balod sa Dagat nga Pula, nga naghimo niini nga sayon alang nila ang pagtabok. Ang tanan nimong katawhan, ubos sa imong panalipod, nakakita niining milagro ug nanabok sila. Nanayaw sila ingon sa mga kabayo nga gibuhian ngadto sa sibsibanan; nanglukso sila daw mga gagmayng karnero ug nagdayeg kanimo, O Ginoo, tungod sa imong pagluwas kanila.
ANG PULONG SA GINOO.
SALAMAT SA DIOS.
SALMO RESPONSORYO
Ps. 105:2-3, 36-37, 42-43
R. Hinumdomi ang mga katingalahan nga gihimo sa Ginoo.
Awiti siya, awita ang iyang kadayganan, isangyaw ang tanan niyang katingalahang mga buhat. Paghimaya diha sa iyang balaan nga ngalan; pagsadya, O mga kasingkasing nga nangita sa Ginoo. (R)
Unya iyang gilaglag ang tanang panganay sa tibuok nilang yuta, ang unang mga bunga sa ilang pagka-lalaki. Ug iya silang giunahan pagpagula nga nagadala puno sa sapi ug bulawan, walay mahuyang diha sa ilang mga tribo. (R)
Kay gihinumdoman niya ang iyang balaang pulong ngadto sa iyang sulugoon nga si Abraham. Ug iyang giunahan pagpagula ang iyang mga tawo uban sa kasadya, uban sa mga singgit sa kalipay, ang iyang mga pinili. (R)
PAGBASA SA SANTOS NGA EBANGHELYO SUMALA NI SAN LUKAS
Lk. 18:1-8
Unya gisugilon ni Jesus kining Sambingaya aron pagtudlo nga kinahanglan sila mag-ampo ug dili gayod nila wad-on ang paglaum. "Sa usa ka lungsod dihay usa ka huwes nga walay kahadlok sa Dios ni pagtahod sa mga tawo. Ug may usa ka biyuda niadtong lungsora nga nagbalikbalik pag-adto kaniya aron paghangyo nga panalipdan ang iyang katungod; nagkanayon siya, 'Tabangi intawon ako batok sa akong kaatbang.' Sulod sa taas nga panahon ang maghuhukom midumili pagtabang, apan sa katapusan miingon siya sa iyang kaugalingon, 'Bisan tuod wala akoy kahadlok sa Dios ni pagtahod sa mga tawo, apan tungod kay nagsamok man kanako kining maong biyuda, paningkamotan ko nga kapanalipdan ang iyang katungod; kay kondili ko kini buhaton magsigi siyag balikbalik hangtod nga kaupsan akog pailob!'" Ug mipadayon ang Ginoo, "Pamati-a ninyo ang gisulti niadtong dautang huwes. Karon, dili ba ang Dios maghukom dapig sa iyang kaugalingong katawhan nga nagpakitabang kaniya sa adlaw ug sa gabii? Maglangan ba siya sa pagtabang kanila? Sultihan ko kamo nga maghukom siya dapig kanila, ug dalion niya ang pagbuhat niini. Apan makakaplag ba kaha og pagtuo ang Anak sa Tawo dinhi sa kalibutan sa iya unyang pag-abot?"
ANG EBANGHELYO SA GINOO.
DAYGON IKAW, O KRISTO.
