KINUTL0 GIKAN SA BASAHON SA KAALAM NI SOLOMON
Wis. 13:1-9
Bisan kinsa nga wala makaila sa Dios buang gayod. Ang mga tawo nga sama niini inagtan-aw sa mga butang nga maayo nga naglibot kanila ug bisan pa niana wala nila makita ang buhi nga Dios. Nakatuon sila sa mga butang nga iyang nahimo, apan wala nila ilha ang naghimo niini. Hinonoa, naghunahuna sila nga ang mga diosdios nga nagmando sa kalibutan mao ang kalayo, o ang hangin, o ang unos, o ang nagatuyok nga mga bituon, o ang nagdahunog nga mga tubig, o ang mga bituon sa kalangitan. Ang mga tawo hilabihan kalingaw sa katahom niining mga butanga nga naghunahuna sila nga kini mga dios, apan angay unta sila nga makaamgo nga kining mga butanga adunay usa ka agalon ug nga mas dako kaayo siya kay niining tanan, kay siya mao man ang magbubuhat sa katahom, ug siya ang naggama niini. Sanglit ang mga tawo nahibulong sa gahom niining mga butanga, ug giunsa niini pagpanglihok, angay unta nga makakat-on sila gikan niini nga ang magbubuhat niini labaw pa kaayo ka gamhanan. Sa atong pagkamatngon unsa kadako ug katahom sa kabuhatan, makakat-on usab kita mahitungod sa Magbubuhat. Apan tingali higpit ra kaayo kita niining mga tawhana. Tingali sa tinuoray, naninguha sila nga makakaplag sa Dios, pan wala sila makahimo niini. Gilibotan sila sa mga buhat sa Dios, nagpadayon sila sa pagtan-aw niini, hangtod sa katapusan nagtuo sila nga tungod kay ang mga butang nga ilang nakita hilabihan man katahom, kini na sila ang mga dios. Apan bisan pa niana, kining mga tawhana sa tinuoray walay katarungan. Kon aduna pa silay igong salabotan sa paghunahuna mahitungod sa kinaiya sa uniberso, nganong wala man gayod nila makaplagi ang Ginoo sa tanang butang?
ANG PULONG SA GINOO.
SALAMAT SA DIOS.
SALMO RESPONSORYO
Ps. 19:2-3, 4-5
R. Ang kalangitan nagasangyaw sa himaya sa Dios.
Ang kalangitan nagapahayag sa himaya sa Dios, ug ang kapanganuran nagsangyaw sa buhat sa iyang kamut. Ang matag-adlaw nag-asoy niini ngadto sa sunod adlaw, ug ang matag gabii ngadto sa sunod gabii. (R)
Walay sulti o pulong kansang tingog wala mabati; Sa tibuok kalibutan nadungog ang ilang tingog, ug ngadto sa kinatumyan sa kalibutan, ang ilang mensahe. (R)
PAGBASA SA SANTOS NGA EBANGHELYO SUMALA NI SAN LUKAS
Lk. 17:26-37
Si Jesus mingon sa iyang mga tinun-an: "Ingon sa nahitabo sa panahon ni Noe, mao usab unya ang mahitabo inig-abot sa Anak sa Tawo. Nagpadayon ang tanan pagpangaon pagpanginom, ug nagminyoay ang mga lalaki ug ang mga hangtod sa adlaw sa pagsulod ni Noe sa arka; unya miabot ang Lunop ug milaglag kanilang tanan. Mahisama usab kini sa panahon ni Lot. Ang tanan nagpadayon pagpanga-on ug pagpanginom, pagpamalit ug pagpamaligya, pagpananom ug pagpamuhat og balay. Sa adlaw sa pagbiya ni Lot sa Sodoma, ang kalayo ug asupre miulan gikan sa langit ug milaglag kanilang tanan. Mao usab unya kini ang mahitabo sa adlaw nga ipadayag ang Anak sa Tawo." "Ang atua sa ibabaw sa atop sa iyang balay niadtong adlawa kinahanglan nga dili manaog ug mosulod sa iyang balay aron pagkuha sa iyang mga kabtangan. Ang atua usab sa iyang uma kinahanglan nga dili mopauli sa iyang balay. Hinumdomi ninyo ang asawa ni Lot! Ang maninguha pagluwas sa iyang kinabuhi, mawad-an hinoon niini; apan ang magwagtang sa iyang kinabuhi, magluwas niini. Niadtong gabhiona, may duha ka tawo nga magdulog sa higdaanan; kuhaon ang usa ug ang usa ibilin. Ug may duha ka babaye nga maggaling: kuhaon usab ang usa ug ang usa ibilin." Ang mga tinun-an nangutana kaniya, "Asa man, Ginoo?" Si Jesus mitubag, "Hain gani ang lawas nga patay adto usab didto magpundok ang mga agila."
ANG EBANGHELYO SA GINOO.
DAYGON IKAW, O KRISTO.
