KINUTLO GIKAN SA BASAHON SA KAALAM NI SOLOMON
Wis. 7:22-8:1
Ang Kaalam nga maoy nagporma sa onan nga ania sa kalibutan mao man ang akong magtutudlo. Ang espiritu sa Kaalam masinabtanon ug balaan. Usa ra siya sa kinaiyahan apan nagapadayag sa iyang kaugalingon sa daghan nga mga paagi. Dili kini siya binuhat sa bisan unsang butang nga materyal, ug nagalihok kini nga may kagawasan. Kini matin-aw, malimpyo, ug masaligon; ug dili kini kapasipad-an. Mahigugmaon kini sa maayo. Mahait kini ug dili mabuntog, maluluy-on ug higala sa mga tawo. Kasaligan kini ug dili kaduhaduhaan ug walay kabalaka. Aduna kini gahom sa tanang mga butang, ug nakakita sa tanan. Midulot kini sa tanang espritu nga masinabuton ug putli, bisan unsa ka dilikado ang iyang kahimtang. Ang Kaalam naglihok nga mas masayon kay sa paglihok mismo; putli Siya kaayo ug molagbas siya sa tanang nga butang. Siya maoy usa ka gininhawa Sa gahom sa Dios—usa ka tubod nga putli Ug masanag sa himaya nga gikan Sa Labing Makagagahom. Walay bisan unsa nga may buling nga makayuhot sa pagsulod ngadto sa Kaalam. Hulagway Siya sa kahayag nga walay kinutoban, usa ka hingpit nga salamin sa kalihokan ug kaayo sa Dios. Bisan kon ang Kaalam magabuhat nga siya rang usa, makabuhat siya bisan unsa. Maghimo siya sa tanan nga bag-o, bisan kon siya mismo dili mag-usab-usab. Gikan sa tanang kaliwatan nagasulod siya sa mga kalag sa balaan nga mga tawo ug naghimo kanila nga mga higala ug propeta sa Dios. Wala nay mas gihigugma sa Dios kay sa mga tawo nga suod sa Kaalam. Ang Kaalam mas matahom pa kay sa adlaw ug sa tanang nga kabituonan. Mas maayo siya kay sa kahayag mismo, tungod kay ang gabi magsunod man kanunay sa adlaw, apan ang dautan dili gayod makabuntog sa Kaalam. Ang iyang dakong gahom nag-abot ngadto sa tanang bahin sa kalibutan, ug nagpahimutang siya sa tanan diha sa mapuslanon nga kahusay.
ANG PULONG SA GINOO.
SALAMAT SA DIOS.
SALMO RESPONSORYO
Ps. 119: 89, 90, 91, 130, 135, 175
R. Ang imong pulong malungtaron sa kahangturan, Ginoo.
Ang imong pulong, O Ginoo, nagalungtad sa kahangturan; malig-on sama sa kalangitan. (R)
Latas sa tanang kaliwatan nagalungtad ang imong kamatuoran: gitukod mo ang kalibutan ug nagabarog kini nga malig-on. (R)
Sumala sa imong mga gimbut-an nagabarog sila nga malig-on. Ang tanang mga butang naga-alagad kanimo. (R)
Ang pagpadayag sa imong mga pulong nagahatag og kahayag, nagahatag og kasayuran sa tawo nga yano. (R)
Padan-aga ang imong nawong nganhi sa imong sulugoon, ug tudloi ako sa imong kasugoan. (R)
PAGBASA SA SANTOS NGA EBANGHELYO SUMALA NI SAN LUKAS
Lk. 17:20-25
May mga Pariseo nga nangutana kang Jesus kon kanus-a maghari ang Dios. Mitubag siya, "Ang paghari sa Dios dili butang nga inyong makita. Walay makaingon, 'Ania ra!' o, 'Atua ra!'; kay ang paghari sa Dios anaa sa sulod ninyo." Unya miingon siya sa mga tinun-an, "Moabot ang panahon nga mangandoy kamo pagtan-aw sa usa sa mga adlaw sa Anak sa Tawo, apan dili gayod kamo makakita niini. Adunay daghan nga moingon, 'Tua didto!' o, 'Dia diri!' Apan ayaw kamo pag-adto aron pagsusi niini. Ingon nga ang kilat mokilab tadlas sa kalangitan gikan sa usa ka bahin niini ngadto sa pikas nga bahin, mao usab unya ang pag-abot sa Anak sa Tawo. Apan una sa tanan kinahanglan mag-antos siya pag-ayo ug unya isalikway siya sa mga tawo nga nagpuyo niining panahona karon."
ANG EBANGHELYO SA GINOO.
DAYGON IKAW, O KRISTO.
