⚪ [F] Dedikasyon sa Basilika sa Letran

PAGBASA GIKAN SA BASAHON NI PROPETA EZEQUIEL

Ez. 47:1-9, 12

Unya gidala ako sa tawo pagbalik ngadto sa pultahan sa Templo. Didto nakita ko nga may nagtubod nga tubig ubos sa bakanan sa Templo dapit sa sidlakan, kay ang Templo nag-atubang man sa sidlakan ug nagdagayday ang tubig paingon sa ubos gikan sa bakanan sa Templo sa habagatan sa halaran. Unya gidala ako niya sa gawas agi sa ganghaan dapit sa amihanan, ug iya akong gidala libot sa ganghaan didto sa gawas nga nag-atubang sa sidlakan; ang tubig gikan sa habagatan. Unya mipaingon siya sa sidlakan dala ang usa ka pisi, ug unya nagsukod siyag balig lima ka gatos ka metros, ug unya gidala ako niya latas sa tubig nga may giladmon nga taga kiting. Unya nagsukod siyag laing lima ka gatos ka metros, ug gidala na usab ako niya latas sa tubig ug taga tuhod na ang giladmon niini. Unya nagsukod siyag laing lima ka gatos ka metros, ug gidala na usab ako niya latas sa tubig ug taga hawak na ang giladmon niini. Unya nagsukod na usab siyag laing lima ka gatos ka metros ug ang tubig nahimo nang usa ka suba nga dili ko na mahimong latason gawas kon molangoy ako. Ug giingnan ako niya, "Tawo, nakita mo ba kini?" Unya gidala ako niya subay sa daplin sa suba. Sa pagbalik ko, nakita ko daplin sa suba ang daghang mga kahoy isigkadaplin niini. Ug giingnan niya ako, "Kining tubiga nagdagayday padulong sa kayutaan sa sidlakan ug naglugsong ngadto sa Walog sa Jordan. Sa pag-abot niini sa Patay'ng Dagat, kini nahimong tab-ang. Ug bisag asa padulong ang tubig sa suba, mabuhi ang tanang binuhat, ug modaghan pag-ayo ang mga isda; kay moabot man didto kining tubiga ug matab-ang ang dagat, busa mabuhi ang tanan nga hiagian niini!" "Apan diha sa mga kadaplinan sa suba manubo ang tanang matang sa kahoy nga makaon ang bunga. Dili malaya ang ilang mga dahon ni kabsag bunga; mamunga sila matag bulan og mga bunga nga maayong kan-on kay ang tubig nga gikinahanglan sa kahoy gikan man sa Templo. Makaon ang ilang bunga ug tambal ang ilang dahon."

SALMO RESPONSORYO

Ps. 46:2-3, 5-6, 8-9

R. Ang makagagahum nga Dios ania uban kanato; ang Dios ni Jacob mao ang atong dalangpanan.

Ang Dios mao ang atong dalangpanan ug ang atong kusog, ang kanunay'ng panabang dinhi sa atong mga kalisdanan. Busa wala kitay gikahadlokan, bisan kon ang kalibutan matay-og ug ang mga bukid mabanlod ngadto sa kahiladman sa dagat. (R)

Dunay suba kansang mga tubig nagalipay sa siyudad sa Dios, ang balaan nga puloy-anan sa Labing Halangdon. Ang Dios anaa sa iyang taliwala; wala kini siyay kahadlokan; ang Dios motabang kaniya inighayag sa banagbanag. (R)

Ang Ginoo sa kagahuman ania uban kanato; ang atong kota mao ang Dios ni Jacob. Umari kamo, tan-awa ang mga buhat sa Ginoo, ang kahibulongang mga butang nga iyang gihimo dinhi sa yuta. (R)

PAGBASA GIKAN SA UNANG SULAT NI SAN PABLO NGADTO SA TAGA-CORINTO

1 Cor. 3:9-11. 16-17

Kay kami mga kauban sa buhat nga naghiusa pag-alagad sa Dios, ug kamo mao ang uma sa Dios. Kamo mao usab ang balay sa Dios. Sumala sa hiyas nga gihatag sa Dios kanako, ug sama sa usa ka batid nga panday, gipahimutang ko ang sukaranan, ug lain na ang magtukod sa balay diha nini. Apan kinahanglan magmatngon ang tagsatagsa unsaon niya kini pagtukod. Kay gipahimutang sa Dios si Jesukristo ingon nga bugtong sukaranan ug wala nay laing sukaranan gawas kaniya. May pipila nga mogamit og bulawan, o plata, o bililhon nga mga bato sa ilang pagtukod sa balay diha sa sukaranan; ang uban mogamit og kahoy, o sagbot, o dagami. Ug ang kalidad sa binuhatan sa tagsatagsa ka tawo makita unya sa adlaw nga kini ibutyag ni Kristo. Kay ang kalayo niadtong adlawa magpadayag sa buhat sa tagsatagsa ka tawo. Sulayan kini sa kalayo ug sutaon ang iyang matuod nga kalidad. Sa walay duhaduha nasayod kamo nga kamo templo sa Dios, ug nagpuyo diha kaninyo ang Espiritu sa Dios. Busa ang moguba sa templo sa Dios, laglagon sa Dios. Kay balaan ang templo sa Dios, ug kamo mao ang templo niya.

PAGBASA SA SANTOS NGA EBANGHELYO SUMALA NI SAN JUAN

Jn. 2:13-22

Niadtong higayona hapit na ang Pangilin sa Pagsaylo, busa miadto si Jesus sa Jerusalem. Didto sa Templo nakita niya ang mga tawo nga namaligyag mga baka, mga karnero, ug mga salampati. Nakita usab niya ang mga mangingilis og kuwarta. Unya si Jesus naghimog latigo nga linubid ug giabog niya ang tanang mananap—ang mga karnero ug mga baka—ngadto sa gawas sa templo. Gilimbuwad usab niya ang mga lamesa sa mga mangingilis og kuwarta, ug gisalibay ang ilang mga sinsilyo. Ug iyang gimandoan ang mga tawo nga namaligyag mga salampati, "Dad-a kini sa gawas! Ayaw ninyo himoang merkado ang balay sa akong Amahan." Unya nahinumdom ang iyang mga tinun-an nga ang Kasulatan nag-ingon, "Ang akong pagmahal sa imong balay, O Dios, nagdilaab sulod kanako sama sa kalayo." Unya nangutana kaniya ang kadagkoan sa mga Judio, "Unsay ilhanan nga ikapakita mo aron pagmatuod nga may katungod ka pagbuhat niini?" Si Jesus mitubag, "Gub-a ninyo kining maong Templo ug tukoron ko kini pag-usab sulod sa tulo ka adlaw." Sila mingon kaniya, "Kap-atan ug unom ka tuig ang pagbuhat niining Temploha, unya tukoron mo kini pag-usab sulod lamang sa tulo ka adlaw?" Apan ang templo nga gihisgotan ni Jesus mao ang iyang lawas. Busa sa dihang nabanhaw na siya, nahinumdom ang iyang mga tinun-an nga gisulti niya kini; ug mituo sila sa Kasulatan ug sa gisulti ni Jesus.