KINUTLO GIKAN SA SULAT NI SAN PABLO NGADTO SA TAGA-ROMA
Rom. 16:3-9, 16, 22-27
Mga igsuon: Ipangumosta ako kang Priscila ug kang Aquila nga mga katabang ko sa pag-alagad kang Cristo Jesus. Gitahan nila ang ilang kinabuhi alang kanako. Busa nagpasalamat ako kanila-ug dili lamang kay ako ra, kondili ang tanang mga simbahan sa mga dili Judio. Ipangumosta usab ako sa mga magtutuo nga magtigoman sa ilang balay. Ipangumosta ako sa minahal kong higala nga si Epeneto nga maoy unang mituo kang Cristo sa lalawigan sa Asia. Ipangumosta ako kang Maria nga naghago pag-ayo tungod kaninyo. Ipangumosta usab ako kang Andronico ug kang Junias nga mga kauban kong Judio nga nabilanggo uban kanako; inila sila sa mga apostoles ug na-Kristohanon una pa kanako. Ipangumosta ako kang Ampliato, ang minahal kong higala diha sa Ginoo. Ipangumosta usab ako kang Urbano nga katabang nato sa pag-alagad kang Cristo ug kang Estaquis nga minahal kong higala. Pagpangumostahay kamo pinaagi sa inigsuon nga halok. Nangumosta kaninyo ang tanang simbahan ni Cristo. Ako, si Tercio, ang gipasulat niini, nangumosta usab kaninyo ingon nga inyong isigkamagtutuo. Si Gayo, ang akong giabotan, kansang balay gihimong tigomanan sa mga magtutuo, nangumosta usab kaninyo, ingon man si Erasto, ang tesorero sa siyudad ug ang atong igsuon nga si Cuarto. Daygon nato ang Dios! Makahimo siya sa paglig-on kaninyo, sumala sa Maayong Balita nga akong giwali, nga mao ang mensahe mahitungod kang Jesucristo, ug sumala sa gipadayag nga tinagoang kamatuoran nga gililong sulod sa dugayng panahon. Apan karon gipadayag na ang maong kamatuoran pinaagi sa mga sinulat sa mga propeta, ug gibutyag kini ngadto sa tanang kanasuran sa mando sa walay katapusang Dios aron ang tanan motuo ug motuman. Himayaon ta ang bugtong maalamn nga Dios pinaagi kang Jesucristo hangtod sa kahangturan! Amen.
ANG PULONG SA GINOO.
SALAMAT SA DIOS.
SALMO RESPONSORYO
Ps. 145:2-3, 4-5, 10-11
R. Daygon ko sa kahangturan ang imong ngalan, O Ginoo.
Himayaon ko ikaw adlaw-adlaw, ug daygon ko ang imong ngalan hangtod sa kahangturan. Dako ang Ginoo ug angay gayod nga daygon ang iyang kadako dili matukib. (R)
Ang tanang kaliwatan nagadayeg sa imong mga buhat ug nagasangyaw sa imong gahom. Nagasulti sila mahitungod sa kasanag sa imong mahimayaong kahalangdon ug nagasaysay sila sa imong katingalahang mga buhat. (R)
Papasalamata kanimo ang tanan mong mga buhat, O Ginoo, ug ang mga nagtuo kanimo padayga kanimo. Pahisgota sila sa himaya sa imong gingharian ug pasultiha mahitungod sa imong gahom. (R)
PAGBASA SA SANTOS NGA EBANGHELYO SUMALA NI SAN LUKAS
Lk. 16:9-15
Si Jesus miingon sa iyang mga tinun-an, "Pagbaton kamog mga higala pinaagi sa mga bahandi niining kalibutana aron inigkahurot na niini, dawaton kamo didto sa walay katapusang puloy-anan. Kinsa kadtong kasaligan sa gagmayng butang, kasaligan usab sa dagko; ug kinsa kadtong limbongan sa gagmayng mga butang, limbongan usab sa dagko. Busa kon kamo dili kasaligan sa inyong paggamit sa bahandi ning kalibutana, kinsay mopiyal kaninyo sa tinuod nga bahandi? Ug kondili kamo kasaligan sa mga butang sa uban, kinsay mohatag kaninyo sa inyong kaugalingong mga butang?" "Walay tawo nga mahimong ulipon sa duha ka agalon, kay mahitabo gayod nga iyang dumtan ang usa ug ang usa iyang higugmaon; o unongan niya ang Usa ug ang usa iyang tamayon. Dili kamo makapaulipon sa Dios ug sa salapi." Sa pagkadungog sa mga Pariseo niining tanan, ilang gibugalbugalan si Jesus kay makisapi man sila. Miingon si Jesus kanila, "Nagpakamatarong kamo atubangan sa mga tawo, apan nasayod ang Dios sa inyong kasing-kasing. Kay ang giisip sa mga tawo nga bililhon kaayo walay bili sa atubangan sa Dios."
ANG EBANGHELYO SA GINOO.
DAYGON IKAW, O KRISTO.
