🟢 Biyernes sa Ikakatloa'g Usa nga Semana sa Tuig

KINUTLO GIKAN SA SULAT NI SAN PABLO NGADTO SA TAGA-ROMA

Rom. 15:14-21

Mga igsuon, siguro ako nga puno kamo sa kaayo ug tanang kahibalo, ug makahimo kamo pagtudlo sa usag-usa. Apan sa pagsulat ko niini, nagmaisogon ako bahin sa pipila ka mga butang nga gipahinumdom ko na kaninyo. Nagmaisogon ako tungod sa pribilihiyo nga gihatag kanako sa Dios, sa akong pagkasulugoon ni Cristo Jesus sa pag-alagad sa mga dili Judio. Nag-alagad ako ingon nga pari aron pagwali sa Maayong Balita nga gikan sa Dios, aron ang mga dili Judio dawaton sa Dios ingon nga halad nga gibalaan sa Espiritu Santo. Busa sa akong pagkahiusa kang Cristo Jesus, makapagarbo ako sa akong pag-alagad sa Dios. Magmaisog ako ug isulti ko lamang ang nahimo ni Cristo pinaagi kanako aron paggiya sa mga dili Judio sa pagsunod sa Dios pinaagi sa mga pulong ug sa mga buhat, sa gahom sa mga ilhanan ug mga milagro ug sa gahom sa Espiritu. Busa sa nagpanaw ako gikan sa Jerusalem paingon sa Ilirico, gisangyaw ko ang Maayong Balita mahitungod kang Cristo. Gitinguha ko kanunay ang pagsangyaw sa Maayong Balita sa mga dapit diin wala pa ikasangyaw si Cristo aron dili ako magtukod diha sa sukaranan nga gipahimutang na sa uban. Sumala sa giingon sa Kasulatan, "Makakita kadtong wala suginli bahin kaniya, ug makasabot kadtong wala makadungog kaniya."

SALMO RESPONSORYO

Ps. 98: 1, 2-3, 3-4

R. Gipadayag sa Ginoo ngadto sa kanasuran ang iyang makaluluwas nga gahom.

Awiti ang Ginoo og usa ka bag-ong awit kay naghimo siyag katingalahang mga buhat; Ang iyang tuong kamut nakadangat og kadaugan alang kaniya, ang iyang balaang bukton. (R)

Ang Ginoo nagpahibalo sa iyang kaluwasan: sa atubangan sa kanasuran iyang gipadayag ang iyang katarong. Nahinumdom siya sa iyang kaluoy ug sa iyang kamatinud-anon alang sa balay ni Israel. (R)

Ang tanang kautlanan sa yuta nakakita sa kaluwasan sa atong Dios. Awiti nga malipayon ang Ginoo, kamong tanang kayutaan; Singgit kamo sa pag-awit; awita ang pagdayeg. (R)

PAGBASA SA SANTOS NGA EBANGHELYO SUMALA NI SAN LUKAS

Lk. 16:1-8

Si Jesus miingon sa iyang mga tinun-an, "Dihay usa ka dato nga may piniyalan, ug gisuginlan siya nga giusik-usikan lamang sa iyang piniyalan ang iyang salapi. Busa iyang gitawag ang piniyalan ug giingnan, 'Unsa man kining akong nadungog mahitungod kanimo? Hatagi akog hingpit nga husay sa imong pagdumala sa akong katigayonan, kay sukad karon dili ka na akong piniyalan.' Busa nagkanayon sa iyang kaugalingon ang piniyalan, 'Papahawaon na man ako sa akong agalon, unsa na may buhaton ko? Dili ako makahimo sa pagpangalot og kanal, ug maulaw usab ako sa pagpakilimos. Ah, kini ang akong buhaton aron kon papahawaon na ako sa akong trabaho, may mga higala unya ako nga mopasaka kanako sa ilang balay.' Busa iyang gitawag ang tanan nga utangan sa iyang agalon. Ang una iyang gipangutana, 'Pila bay utang nimo sa akong agalon?' 'Usa ka gatos ka taro nga lana,' mitubag ang tawo. 'Ania ang imong bali. Lingkod og kalim-an lang ang isulat,' matod sa piniyalan. Ug giingnan niya ang usa, 'Ug ikaw, pila may imong utang?' 'Usa ka libo ka bakid nga trigo,' mitubag ang tawo. 'Ania ang imong bali; walo ka gatos lang ang isulat,' miingon ang piniyalan. Ang agalon niining tikasan nga piniyalan midayeg kaniya tungod sa iyang inantigo nga buhat; kay ang mga tawo niining kalibutan mas maantigo modumala sa ilang buluhaton kay sa mga tawo nga iya sa kahayag."