KINUTLO GIKAN SA SULAT NI SAN PABLO NGADTO SA TAGA-ROMA
Rom. 14:7-12
Mga igsuon, kay walay usa kanato nga magkinabuhi ug mamatay alang lamang sa kaugalingon; kon buhi kita, ang atong pagkabuhi alang sa Ginoo; ug kon amatay, alang usab kita sa Ginoo. Busa buhi kon patay iya kita sa Ginoo. Kay si Cristo namatay ug nabanhaw aron mahimo siyang Ginoo sa mga buhi ug sa mga patay. Busa nganong maghukom ug magtamay man kamo sa inyong isigkamagtutuo? Moatubang kitang tanan sa Dios aron hukman niya. Kay ang Kasulatan nag-ingon, "Tungod kay buhi ako, nag-ingon ang Ginoo, moluhod ang tanan sa akong atubangan, Ug ang tanan magdayeg sa Dios." Busa ang tagsatagsa kanato maghatag og husay sa iyang kaugalingon ngadto sa Dios.
ANG PULONG SA GINOO.
SALAMAT SA DIOS.
SALMO RESPONSORYO
Ps. 27:1, 4, 13-14
R. Nagatoo ako nga makakita ako sa mga butang nga maayo sa Ginoo diha sa yuta sa mga buhi.
Ang Ginoo maoy akong kahayag ug akong kaluwasan kinsa maoy akong kalisangan? Ang Ginoo maoy dalangpanan sa akong kinabuhi; kinsa pa may akong kahadlokan? (R)
Usa ka butang ang akong gipangayo sa Ginoo; kini mao ang akong gipangita: Ang pagpuyo diha sa balay sa Ginoo sa tanang mga adlaw sa akong kinabuhi Aron makasud-ong ako sa kahiligugmaon sa Ginoo ug makapalandong sa iyang templo. (R)
Gituhoan ko nga makakita ako sa kaayo sa Ginoo diha sa yuta sa mga buhi. Paabota sa walay kahadlok ang Ginoo: pagmalig-on sa kasingkasing, ug paabota ang Ginoo. (R)
PAGBASA SA SANTOS NGA EBANGHELYO SUMALA NI SAN LUKAS
Lk. 15:1-10
Usa niana ka higayon may daghang mga kobrador sa buhis ug mga makasasala nga miadto kang Jesus aron pagpamati kaniya. Unya ang mga Pariseo ug ang mga magtutudlo sa Balaod nagbagulbol nga nag-ingon, "Kining tawhana nag-abiabi sa mga makasasala ug nakigsalo pa gani kanila!" Tungod niini misugilon kanila si Jesus og usa ka sambingay: "Pananglit usa kaninyo may usa ka gatos ka karnero ug nawala ang usa niini, unsa may iyang buhaton? Iyang biyaan ang kasiyaman ug siyam didto sa sibsibanan, ug pangitaon niya ang nawala nga karnero hangtod nga kini iyang makaplagan. Ug inigkakaplag niya niini, malipay siya pag-ayo ug iya kining pas-anon, ug dad-on pagbalik ngadto sa ila. Unya iyang dapiton ang iyang mga higala ug mga silingan, ug moingon siya kanila, 'Maglipay kita kay akong nakaplagan ang nawala kong karnero!' Sa ingon usab niini, sultihan ko kamo nga mas dako ang kalipay didto sa langit tungod sa usa ka makasasala nga maghinulsol, kay sa kasiyaman ug siyam ka tawo nga matarong nga wala magkinahanglan nga maghinulsol." "O pananglit usa ka babaye nga may napulo ka tagsa ka dako kawad-an og usa, unsa may iyang buhaton? Magdagkot siya og suga ug manilhig sa iyang balay, ug iya kining pangitaon pag-ayo hangtod makaplagan. Ug inigkakaplag niya niini, tawgon niya ang iyang mga higala ug mga silingan, ug moingon siya kanila, 'Maglipay kita, kay akong nakaplagan ang nawala kong usa ka dako!' Sa ingon usab niini, sultihan ko kamo nga mangalipay ang mga anghel sa Dios tungod sa usa ka makasasala nga maghinulsol."
ANG EBANGHELYO SA GINOO.
DAYGON IKAW, O KRISTO.
