KINUTLO GIKAN SA SULAT NI SAN PABLO NGADTO SA TAGA-ROMA
Rom. 13:8-10
Mga igsuon: Ayaw pagapos sa utang gawas sa utang sa paghigugmaay. Ang nahigugma sa iyang isigkatawo naka-tuman sa Balaod. Ang kasugoan nga nag-ingon, "Ayaw panapaw, ayaw pagpatay, ayaw pangawat, ayaw kaibog," kining tanan ug uban pa, nalangkob sa usa ka sugo, "Higugmaa ang imong isigkatawo sama sa imong kaugalingon." Ang nahigugma sa iyang isigkatawo dili gayod makaako paghimog dautan sa iyang isigkatawo. Busa ang paghigugma mao ang katumanan sa Balaod.
ANG PULONG SA GINOO.
SALAMAT SA DIOS.
SALMO RESPONSORYO
Ps. 112: 1-2, 4-5, 9
R. Bulahan ang tawo nga maluluy-on ug nagpahulam kanila nga nagkinahanglan.
Bulahan ang tawo nga mahadlokon sa Ginoo, nga nahigugma pag-ayo sa iyang mga sugo. Ang iyang kaliwat mahimong gamhanan ibabaw sa yuta; ang kaliwat nga matarong pagapanalanginan. (R)
Mobanagbanag siya latas sa kangitngit, usa ka kahayag alang sa matarong; mahigugmaon siya ug maluluy-on ug matarong. Bulahan ang tawo nga manggihatagon ug magpahulam, nga nagapamuhat uban sa katarong. (R)
Kusog siyang manghatag sa kabus; ang iyang kamanggihatagon molungtad hangtod sa kahangturan; ang iyang gahom bayawon diha sa himaya. (R)
PAGBASA SA SANTOS NGA EBANGHELYO SUMALA NI SAN LUKAS
Lk. 14:25-33
Sa usa ka higayon niana, dihay dakong panon sa mga tawo nga mikuyog kang Jesus, ug milingi siya ug miingon kanila, "Kinsa kadtong moari kanako nga dili magdumot sa iyang amahan ug inahan, sa iyang asawa ug mga anak ug mga igsuon, ingon man sa iyang kaugalingon, dili mahimong akong tinun-an. Ug kinsa kadtong dili mopas-an sa iyang krus ug mosunod kanako, dili mahimo nga akong tinun-an. Kon usa kaninyo naglaraw pagtukod og tore, tun-an una niya kini ug iyang bana-banaon pila ang magasto, aron pagsuta kon may igo ba siyang salapi nga ikahuman niini. Kay kon kini dili niya buhaton, dili mahuman ang tore tapos niya ikapahimutang ang pundasyon; ug ang tanan nga makakita sa gisangpotan mobiaybiay unya kaniya. Ug moingon sila, 'Kining tawhana nagpatugag tukod og tore, apan dili diay makahuman niini! Kon ang usa ka hari nga may napulo ka libo ka sundalo makiggubat batok sa laing hari nga may kawhaan ka libo ka sundalo, iya unang tun-an ug hukman kon makasukol ba siya sa maong hari. Kondili siya makasukol, mapugos siya pagpadalag mensahero sa pagtagbo sa maong hari samtang atua pa siya sa layo aron makigsabotsabot alang sa kahusay.' Sa samang pagkaagi, walay bisan kinsa kaninyo nga mahimong akong tinun-an gawas kon iyang biyaan ang tanan niyang katigayonan.
ANG EBANGHELYO SA GINOO.
DAYGON IKAW, O KRISTO.
