KINUTLO GIKAN SA SULAT NI SAN PABLO NGADTO SA TAGA-ROMA
Rom. 12:5-16
Kita usab, bisan daghan, usa lamang ka lawas nga nahiusa kang Cristo, ug nalambigit kita sa usag-usa ingon nga nagkalainlaing bahin sa usa ka lawas. Busa angay natong gamiton ang atong nagkalainlaing katakos sumala sa grasya nga gibhatag sa Dios kanato. Kon may katakos kita sa pagwali sa mensahe sa dios, himoon ta kini sumala sa pagtuo nga ania kanato. Kon may katakos diba sa pag-alagad, kinahanglan mag-alagad kita; kon sa pagtudlo, magtudlo kita. Kon may katakos kita sa pagdasig sa uban, buhaton ta kini. Ang mohatag, maghatag nga walay tihiktihik; ang mangulo kinahanglan dili magligoyligoy; ang anaa sa buhat sa kaluoy kinahanglan magbuhat nga malipayon. Pagmatinud-anon kamo sa inyong paghigugma. Likayi ang dautan ug hupti ang maayo. Paghigugmaay kamo pag-ayo ingon nga mga magsuon diha kang Cristo, ug pagtinahoray kamo. Pagkugi kamo ug alagari ang Ginoo sa kinasingkasing gayod. Paglipay kamo tungod sa inyong paglaum; pagpailob kamo sa inyong mga kalisdanan, ug pag-ampo kanunay. Bahini sa inyong mga kabtangan ang inyong isigkamagtutuo nga anaa sa kawad-on, ug dawata sa inyong balay ang mga dumuduong. Pag-ampo kamo sa Dios nga panalanginan niya kadtong naglutos kaninyo—panalanginan niya ug dili tunglohon. Paglipay kamo uban sa naglipay ug hilak uban sa naghilak. Parihasa pagtagad ang tanang tawo. Ayaw kamno pagpagarbo kondili dawata ang ubos nga buluhaton. Ayaw kamo pagpakamaalam.
ANG PULONG SA GINOO.
SALAMAT SA DIOS.
SALMO RESPONSORYO
Ps. 131:1, 2, 3
R. Diha kanimo, Ginoo, nakakaplag ako sa akong kalinaw.
O Ginoo, ang akong kasingkasing wala magpataas ni ang akong mga mata nagginarboso; Wala ako magkalingaw sa dagkong mga butang, ni sa mga butang nga taas ra kaayo kanako. (R)
Hinoon, akong gihupay ug gipahilom ang akong kalag ingon og bata nga gilutas. Sama sa bata nga gilutas diha sa sabakan sa iyang inahan, sa ingon mao ang akong kasingkasing sulod kanako. (R)
O Israel, paglaum sa Ginoo karon ug hangtod sa kahangturan. (R)
PAGBASA SA SANTOS NGA EBANGHELYO SUMALA NI SAN LUKAS
Lk. 14:15-24
Usa sa mga tawo nga nagtambong sa kan-anan nakadungog niini ug miingon siya kang Jesus, "Bulahan kadtong makatambong sa kan-anan didto sa Gingharian sa Dios!" Si Jesus miingon kaniya, "May tawo nga naghimog dakong kombira, ug daghang mga tawo ang iyang gidapit. Sa pag-abot na sa adlaw sa kombira, iyang gipadala ang iyang sulugoon aron pagpahibalo sa iyang mga dinapit nga andam na ang tanan. Apan namalibad ang tagsatagsa kanila. Ang una miingon sa sulugoon, 'Nakapalit akog yuta ug kinahanglan nga susihon ko kini; pasayloa nga dili ako makatambong.' Ang ikaduha miingon, 'Nakapalit akog lima ka parisan nga baka ug paingon ako ngadto aron sulayan sila; busa pasayloa nga dili ako makatambong.' Ug ang ikatulo mingon, 'Bag-o pa akong gikasal, busa dili ako makatambong.' Tungod niini, mipauli ang sulugoon ug gisuginlan niya sa tanan ang iyang agalon. Labihang sukoa sa iyang agalon ug miingon sa sulugoon, 'Lakaw pagdali ngadto sa mga kadalanan ug kasuok-suokan sa lungsod, ug dad-a nganhi ang mga kabus, ang mga bakol, ang mga buta, ug ang mga piang.' Wala madugay mingon ang sulugoon, 'Sir, natuman na ang imong sugo, apan may bakante pa.' Busa ang agalon miingon sa Sulugoon, 'Lakaw ngadto sa kadalanan ug sa kasuokan nga gawas sa lungsod ug paanhia ang mga tawo aron mapuno ang akong balay. Sultihan ko kamo: walay usa niadtong una kong gidapit nga makatilaw sa akong kombira!'"
ANG EBANGHELYO SA GINOO.
DAYGON IKAW, O KRISTO.
