KINUTLO GIKAN SA SULAT NI SAN PABLO NGADTO SA TAGA-ROMA
Rom. 11:29-36
Kay dili gayod mag-usab-usab ang Dios sa iyang hunahuna labot sa iyang pilion ug panalanginan. Kamong mga dili Judio misupil sa Dios kaniadto, apan karon gikaluy-an kamo sa Dios tungod kay misupil man ang mga Judio. Sa maong pagkaagi, tungod sa kaluoy nga nadawat ninyo, ang mga Judio misupil sa Dios aron sila usab makadawat sa kaluoy sa Dios. Kay gihimo sa Dios ang tanang mga tawo nga masupilon aron ikapakita niya ang iyang kaluoy kanilang tanan. Pagkabahandianon gayod sa Dios ug pagkatulugkaron sa iyang kaalam ug kahibalo! Kinsay makasaysay sa iyang hukom? Kinsay makasabot sa iyang mga paagi? Sumala sa giingon sa Kasulatan: "Kinsay nasayod sa hunahuna sa Ginoo? Kinsay makatambag kaniya? Kinsay nakahatag kaniyag bisan unsa, aron iyang baslan?" Kay siyay nagbuhat sa tanang butang, ug nahimong mao karon ang tanang butang pinaagi kaniya ug alang kaniya. lya sa Dios ang himaya sa walay katapusan! Amen.
ANG PULONG SA GINOO.
SALAMAT SA DIOS.
SALMO RESPONSORYO
Ps. 69:30-31, 33-34, 36-37
R. Ginoo, sa imong dakong gugma, tubaga ako.
Naguol ako ug ania sa kasakit; O Dios, sa imong makaluluwas nga hinabang panalipdi ako. Daygon ko ang ngalan sa Dios diha sa awit, ug himayaon ko siya uban sa pasalamat. (R)
"Tan-awa, kamong mga mapaubsanon, ug pagsadya; kamo nga nangita sa Dios, maglipay unta ang inyong mga kasingkasing. Kay ang Ginoo nagapatalinghug sa kabus, ug ang iyaha nga gigapus dili niya tamayon." (R)
Kay ang Dios magluwas sa Sion ug magtukod pag-usab sa mga siyudad sa Juda. Ang mga anak sa iyang mga sulugoon maoy makapanunod niini, ug sila nga nahigugma sa imong ngalan magpuyo niini. (R)
PAGBASA SA SANTOS NGA EBANGHELYO SUMALA NI SAN LUKAS
Lk. 14:12-14
Unya mniingon si Jesus ngadto sa nagdapit kaniya, “Kon ikaw magkombira, ayaw dapita ang imong mga higala, o ang imong mga igsuon, o ang imong mga paryenti, o ang mga dato mong mga silingan, kay sila mobalos pagdapit kanimo ug sa ingon niini ikaw hibaslan sa imong gibuhat. Kon magkombira ka, maoy dapita ang mga kabus, ang mga bakol, ang mga piang, ug ang mga buta, ug mabulahan ka kay dili man sila makabalos kanimo. Baslan ka ra sa Dios inigkabanhaw sa mga matarong.
ANG EBANGHELYO SA GINOO.
DAYGON IKAW, O KRISTO.
