PAGBASA GIKAN SA SULAT NI SAN PABLO NGADTO SA TAGA-ROMA
Rom. 8:31-39
Karon nga ato nang nasayran kini, unsa may atong ikaingon? Kon dapig kanato ang Dios, kinsay makigbatok kanato? Kon wala magdumili ang Dios pagtugyan sa iyang Anak ngadto sa kamatayon tungod kanatong tanan, dili ba hatagan kita niya sa tanang butang nga atong pangayoon kaniya? Kinsay mangahas pagsumbong sa mga piniling katawhan sa Dios? Ang Dios mismo nag-ila kanila nga walay sala. May makahukom ba kanila nga sila sad-an? Si Kristo Jesus mao ang nagpakamatay ug gibanhaw; atua siya sa tuo sa Dios ug nangaliyupo alang kanato! Busa, kinsay makapahimulag kanato sa gugma ni Kristo? Ang kasamok ba, ang kalisdanan, ang mga paglutos, ang gutom, ang kakabos, ang katalagman, o ang kamatayon? Sumala sa Kasulatan, "Tungod kanimo, mamiligro kami sa tibuok adlaw, nahisama kami sa ihawon nga mga karnero." Dili! Hinonoa, taliwala niining tanan, may hingpit kitang kadaugan pinaagi kaniya nga nahigugma kanato! Kay siguro ako nga walay bisan unsa nga makapahimulag kanato sa iyang gugma: bisan ang kamatayon, ni ang kinabuhi, ni ang mga anghel, ni ang mga langitnong punoan o mga gahom, ni ang mga butang karon ug sa umaabot nga kapanahonan, bisan ang kalibutan sa itaas o sa ilalom—wala gayoy bisan unsa sa mga binuhat nga makapahimulag kanato sa gugma sa Dios nga naato pinaagi sa atong Ginoong Kristo Jesus.
ANG PULONG SA GINOO.
SALAMAT SA DIOS.
SALMO RESPONSORYO
Ps. 109:21-22, 26-27, 30-31
R. Luwasa ako Ginoo diha sa imong kaluoy.
O Dios, akong Ginoo, kaloy-i ako tungod sa imong ngalan; sa imong manggihatagon nga kaluoy luwasa ako; kay alaot ako ug kabos, ug ang akong kasingkasing gilagbasan sulod kanako. (R)
Tabangi ako, O Ginoo, akong Dios; luwasa ako, diha sa imong kaluoy, ug pahibaloa sila nga kini mao ang imong kamot; nga ikaw, O Ginoo, maoy naghimo niini. (R)
Isulti ko pag-ayo ang akong mga pasalamat ngadto sa Ginoo, ug taliwala sa panon sa katawhan daygon ko siya, kay mibarog siya sa tuong kamot sa tawo nga kabos, aron pagluwas kaniya gikan kanila nga buot mohukom kaniya. (R)
PAGBASA SA SANTOS NGA EBANGHELYO SUMALA NI SAN LUKAS
Lk. 13:31-35
Niadtong higayona, may pipila ka mga Pariseo nga miadto kang Jesus ug miingon kaniya, "Kinahanglan mopahawa ka dinhi ug moadto sa ubang dapit, kay si Herodes buot mopatay kanimo." Si Jesus mitubag, "Adtua ug suginli kanang milo: 'Naghingilin ako sa mga yawa ug nag-ayo sa mga masakiton karon ug ugma, ug sa ikatulo ka adlaw akong tapuson ang akong buluhaton.' Apan magpadayon ako sa akong panaw karong adlawa, ugma ug sa sunod nga adlaw; dili maayo ang usa ka propeta nga patyon gawas sa Jerusalem." "Jerusalem, Jerusalem! Imong gipamatay ang mga propeta ug gibato ang mga sinugo nga gipadala sa Dios kanimo! Pagkadaghang higayon nga buot ako mogakos sa tanan mong mga anak, ingon sa usa ka himungaan nga nagtigom sa iyang mga piso ilalom sa iyang mga pako, apan dili ka buot nga buhaton ko kini! Karon ang imong balay biyaan sa hingpit. Dili kana makakita kanako hangtod sa adlaw nga ikaw miingon, 'Bulahan siya nga mianhi sa ngalan sa Ginoo.'"
ANG EBANGHELYO SA GINOO.
DAYGON IKAW, O KRISTO.
