PAGBASA GIKAN SA SULAT NI SAN PABLO NGADTO SA TAGA-ROMA
Rom. 8:26-30
Sa samang pagkaagi, sa atong pagkahuyang tabangan kita sa Espiritu, kay wala kita masayod unsaon nato pag-ampo; ang Espiritu mismo mangaliyupo sa Dios alang kanato, uban sa mga pag-agulo nga dili ikasaysay. Ug ang Dios nga nasayod sa kasingkasing sa tawo, nasayod unsay gihunahuna sa Espiritu, kay ang Espiritu mangaliyupo sa Dios alang sa iyang katawhan sumala sa iyang kabubut-on. Nasayod kita nga diha sa tanang butang nagbuhat ang Dios alang sa kaayohan niadtong nahigugma kaniya ug sa iyang mga tinawag sumala sa iyang tuyo. Kadtong gipili nang daan sa Dios, gilain niya aron mahisama sa iyang Anak, aron ang iyang Anak mahimong kamagulangan sa daghang mga magsuon. Busa gitawag sa Dios kadtong iya nang gilain; wala lamang niya tawga sila kondili gihimo usab niyang matarong ug gipaambit sa iyang himaya.
ANG PULONG SA GINOO.
SALAMAT SA DIOS.
SALMO RESPONSORYO
Ps. 13:4-5, 6
R. Ginoo, ang tanan kong paglaum, anaa sa imong mahigugmaong kaluoy.
Tan-awa, tubaga ako, O Ginoo, Dios ko! Tagaig kahayag ang akong mga mata aron dili ako matulog diha sa kamatayon. Ayaw paingna ang akong kaaway, "Nakabuntog ako kaniya"; tingali unyag malipay ang akong kaaway sa akong kapakyas. (R)
Bisan nagsalig ako sa imong kaluoy; palipaya ang akong kasingkasing diha sa imong kaluwasan; paawita ako mahitungod sa Ginoo, "Maayo siya kanako." (R)
PAGBASA SA SANTOS NGA EBANGHELYO SUMALA NI SAN LUKAS
Lk. 3:22-30
Human niini, miadto si Jesus sa kalungsoran ug kabalangayan ug nanudlo samtang nagpaingon siya sa Jerusalem. Unya may usa ka tawo nga nangutana kaniya, "Sir, diyotay ra bay maluwas?" Si Jesus mitubag, "Paningkamot kamo pagsulod sa sigpit nga pultahan, kay daghan ang mosulay apan dili makasulod." "Mobangon ang pangulo sa panimalay ug sirhan niya ang pultahan. Unya inigtindog ninyo didto sa gawas ug magsugod kamo pagtuktok sa pultahan nga magaingon, 'Sir, ablihi intawon ang pultahan!' Motubag siya kaninyo, 'Wala ako mahibalo kon taga diin kamo!' Unya motubag usab kamo, 'Mikaon ug miinom kami uban kanimo, ug nanudlo ikaw sa among lungsod!' Apan motubag siya pag-usab, 'Wala ako mahibalo kon taga diin kamo. Pahilayo kamo kanako kamong mga dautan!' Hilabihan unya ang inyong pagdanguyngoy ug pagkagot sa inyong ngipon inigkakita ninyo kang Abraham, kang Isaac, ug kang Jacob, ug sa tanang mga propeta didto sa Gingharian sa Dios; samtang adto ra kamo sa gawas! Daghang mga tawo nga mangabot gikan sa sidlakan ug kasadpan, ug gikan sa amihanan ug habagatan, nga motambong sa kan-anan didto sa Gingharian sa Dios. Ug unya kadtong naulahi karon mahiuna, ug daghan usab nga karon nahiuna, maulahi."
ANG EBANGHELYO SA GINOO.
DAYGON IKAW, O KRISTO.
