PAGBASA GIKANSASULAT NI SAN PABLO NGADTO SA TAGA-ROMA
Rom. 8:12-17
Busa mga igsuon, aduna kitay katungdanan apan dili sa pagkinabuhi sumala sa tawhanong kinaiya. Kon magkinabuhi kamo minandoan sa tawhanong kinaiya, mamatay gayod kamo; apan kon pinaagi sa Espiritu patyon ninyo ang tawhanong binuhatan, mabuhi gayod kamo. Ang tanang gimandoan sa Espiritu sa Dios, mga anak sa Dios. Kay ang Espiritu nga gihatag sa Dios kaninyo dili maghimo kaninyong ulipon aron mahadlok kamo; hinonoa, ang maong Espiritu maghimo kaninyo nga mga anak sa Dios. Tungod niini makasangpit na kita sa Dios sa pag-ingon, "Amahan ko!" Makighiusa ang maong Espiritu Sa atong espiritu ug magmatuod nga mga anak na kita sa Dios. Ug sanglit mga anak na man kita niya, makapanag-iya kita sa mga panalangin nga gitagana sa Dios sa yang katawhan. Dugang pa niana, mahimo kitang masigkamanununod ni Kristo sa tanan nga gitagana sa Dios kang Kristo; kay kon makig-ambit kita sa iyang mga pag-antos, makaambit usab kita sa iyang himaya.
ANG PULONG SA GINOO.
SALAMAT SA DIOS.
SALMO RESPONSORYO
Ps. 68:2-4, 6-7, 20-21
R. Ang atong Dios mao ang Dios sa kaluwasan.
Ang Dios mitindog; ang iyang mga kaaway nagkatibulaag, ug sila nga nagdumot kaniya nanagan sa iyang atubangan. Apan ang matarong nalipay ug nagsadya atubangan sa Dios; nangalipay sila ug nagsadya. (R)
Ang amahan sa mga ilo ug ang tigpanalipod sa mga balo mao ang Dios diha sa iyang balaang puloy-anan. Ang Dios naghatag og usa ka puloy-anan sa mga biniyaan; gipagula niya ang mga binilanggo ngadto sa kausbawan. (R)
Daygon adlaw-adlaw ang Ginoo, nga nag-abaga sa atong mga palas-anon; ang Dios nga mao ang atong kaluwasan. Ang Dios usa ka Dios nga manluluwas alang kanato; ang Ginoo, akong Ginoo, maoy nagabuot sa mga agianan sa kamatayon. (R)
PAGBASA SA SANTOS NGA EBANGHELYO SUMALA NI SAN LUKAS
Lk. 13:10-17
Usa niana ka Adlaw'ng Igpapahulay nagtudlo si Jesus didto sa usa ka sinagoga. Didto may babaye nga giyawaan ug tungod niini, nasakit siya sulod na sa napulog-walo ka tuig. Nagtikubo na siya ug dili na makatuyhad. Sa pagkakita ni Jesus kaniya, mingon siya sa babaye, "Naayo na ikaw sa imong sakit!" Ug iyang gitapion ang iyang kamot sa babaye, ug dihadiha nakatuyhad siya ug gidayeg niya ang Dios. Ang opisyal sa sinagoga nasuko nga si Jesus nag-ayo sa masakiton sa Adlaw'ng lgpapahulay, ug miingon siya sa mga tawo, "May unom ka adlaw nga kita makatrabaho. Anhi kamo niana nga adlawa kon gusto kamong mamaayo, apan dili sa Adlaw'ng lgpapahulay!" Mitubag ang Ginoo kaniya, "Mga tigpakaaron-ingnon kamo! Sa Adlaw'ng lgpapahulay bisan kinsa kaninyo mobadbad sa inyong baka kon asno gikan sa kuwadra ug dad-on ninyo kini ngadto sa gawas aron paimnon. Karon, aniay kaliwat ni Abraham nga gipaantos ni Satanas sulod na sa napulog-walo ka tuig; dili ba siya mahimong ayohon sa Adlaw'ng lgpapahulay?" Naulaw ang tanan niyang mga kaaway sa pagkadungog nila sa tubag niya, samtang nalipay ang tanang mga tawo sa kahibulongang mga buhat ni Jesus.
ANG EBANGHELYO SA GINOO.
DAYGON IKAW, O KRISTO.
