PAGBASA GIKAN SASULAT NI SAN PABLO NGADTO SA TAGA-ROMA
Rom. 8:1-11
Karon dili na pakasad-on kadtong nahiusa kang Kristo Jesus. Kay ang balaod sa Espiritu nga naghatag ug kinabuhi pinaagi sa pagkahiusa kang Kristo Jesus nagluwas kanako gikan sa balaod sa sala ug sa kamatayon. Ang wala mahimo sa Balaod tungod sa kahuyang sa tawo, gihimo sa Dios. Gihukman niya ang sala diha sa kinaiya sa tawo pinaagi sa pagpadala sa iyang anak nga mianhi nga may kinaiya sa tawong makasasala aron paglaglag sa sala. Gihimo kini sa Dios aron ang gikinahanglan sa Balaod matuman dinhi kanato nga nagkinabuhi na sumala sa Espiritu, dili sumala sa tawhanong kinaiya. Kay kadtong nagkinabuhi sumala sa ilang tawhanong kinaiya naghunahuna kanunay sa mga butang tawhanon, ingon nga kadtong nagkinabuhi sumala sa Espiritu naghunahuna kanunay sa espirituhanong mga butang. Ang paghunahuna kanunay sa mga butang tawhanon mosangpot sa kamatayon, apan ang paghunahuna kanunay sa mga butang espirituhanon mosangpot sa kinabuhi ug kalinaw. Busa ang tawo kaaway sa Dios kon maghunahuna siya kanunay sa mga butang tawhanon, kay dili man siya motuman sa sugo sa Dios ug dili gayod siya makatuman niini. Ang tawo nga nagkinabuhi sumala sa tawhanong kinaiya dili gayod makapahimuot sa Dios. Apan wala na kamo magkinabuhi nga minandoan sa tawhanong kinaiya kondili sa Espiritu, kon tinuod man ugaling nga ang Espiritu sa Dios anaa na sa inyong kasingkasing. Kadtong walay Espiritu ni Kristo, dili iya ni Kristo. Apan kon nagpuyo si Kristo sa inyong kasingkasing, bisan patay ang inyong lawas tungod sa sala, buhi ang inyong espiritu tungod kay gihimo man kamong matarong sa Dios. Kon nagpuyo inyong kasingkasing ang Espiritu sa Dios nga nagbanhaw kang Jesus, siya nga nagbanhaw kang Kristo mohatag usab og kinabuhi sa inyong mga lawas pinaagi sa iyang Espiritu nga anaa kaninyo.
ANG PULONG SA GINOO.
SALAMAT SA DIOS.
SALMO RESPONSORYO
Ps. 24:1-2, 3-4, 5-6
R. Ginoo, mao kini ang katawhan nga nangandoy sa pagtan-aw sa imong nawong.
Sa Ginoo ang yuta ug ang iyang kapuno; ang kalibutan ug sila nga nagpuyo niini, kay iya kining gitukod ibabaw sa kadagatan, ug iya kining gibuhat ibabaw sa kasubaan. (R)
Kinsay makatungas sa bukid sa Ginoo? O kinsay makabarog sa iyang balaang dapit? Siya kansang mga kamot walay mga sala, kansang kasingkasing malinis, siya nga wala magtinguha sa mga butang nga walay hinungdan. (R)
Makadawat siya og panalangin gikan sa Ginoo, ganti gikan sa Dios nga iyang manluluwas. Mao kini ang kaliwat nga nangita kaniya, nga nangita sa nawong sa Dios ni Jacob. (R)
PAGBASA SA SANTOS NGA EBANGHELYO SUMALA NI SAN LUKAS
Lk. 13:1-9
Niadtong higayona may mga tawo didto nga misugilon kang Jesus mahitungod sa mga taga-Galilea nga gipamatay ni Pilato samtang naghalad sila ngadto sa Dios. Apan mingon si Jesus kanila, "Tungod kay gipamatay kining mga tawhana sa maong paagi, gisabot ba ninyo nga labaw pa sila ka makasasa la kay sa ubang Galilyanhon? Dili! Sultihan ko kamo nga kondili kamo maghinulsol ug mobiya sa inyong mga sala. mangamatay usab kamong tanan sama kanila. Mahitungod niadtong napulog-walo nga nangamatay didto sa Siloam kay natumpagan sa tore, gipakaingon ba ninyo nga kadto sila mas dautan pa kay sa tanang molupyo sa Jerusalem? Dili! Sultihan ko kamo nga kondili kamo maghinulsol ug mobiya sa inyong mga sala, mangamatay usab kamong tanan sama kanila." Unya misulti si Jesus kanila niining sambingaya: "May usa ka tawo nga may kahoy'ng igera diha sa iyang parasan. Miadto siya aron pagpangita og bunga niini, apan wala siyay nakaplagan. Busa miingon siya sa iyang hardinero, 'Tan-awa ra, tulo na karon ka tuig nga nag-anhian ako dinhi aron pagpangitag bunga niining kahoya, apan wala gayod akoy nakaplagan bisag usa. Busa putla kini kay nag usik lamang sa katambok sa yuta.' Apan ang hardinero mitubag, 'Pasagdi una, Sir, bisan niining tuiga na lamang: kay akong libotan og kubkob ang punoan ug unya akong abunohan. Kon mobunga kini sa sunod tuig, maayo; apan kondili, ipaputol kini."
ANG EBANGHELYO SA GINOO.
DAYGON IKAW, O KRISTO.
