PAGBASA GIKAN SA SULAT NI SAN PABLO NGADTO SA TAGA-ROMA
Rom. 7:18-25
Nasayod ako nga wala gayoy maayo nga ania kanako, sa ato pa, sa akong pagkatawhanon. Kay bisan may tinguha ako sa pagbuhat sa maayo, dili man ako makahimo. Dili man ako makahimo pagbuhat sa maayo nga buot kong buhaton, ug gibuhat ko hinoon ang dautan nga dili ko buot buhaton. Kon gibuhat ko ang dili ko buot buhaton, nagpasabot kini nga dili ako maoy nagbuhat niini, kondili ang sala nga ania kanako. Busa nasayran ko kining usa ka balaod nga sa higayon nga gusto akong magbuhat sa maayo, ang dautan hinoon ang akong mabuhat. Sa akong kasingkasing nakagusto ako sa balaod sa Dios, apan ania usab kanako ang usa ka kinaiya nga sukwahi sa balaod nga nagustohan ko, ug kini nag-ulipon kanako sa balaod sa sala nga ania sa akong lawas. Pagkaalaot ko gayod! Kinsa bay moluwas kanako gikan niining lawas nga nagyudyod kanako ngadto sa kamatayon? Salamat sa Dios pinaagi sa atong Ginoong JesuKristo.
ANG PULONG SA GINOO.
SALAMAT SA DIOS.
SALMO RESPONSORYO
Ps. 119:66, 68, 76, 77, 93, 94
R. Tudlo-i ako sa imong mga balaod, O Ginoo.
Tudlo-i ako sa kaalam ug kahibalo, kay nagasalig ako sa imong kasugoan. (R)
Maayo ikaw ug manggihatagon; tudlo-i ako sa imong kasugoan. (R)
Maghupay unta kanako ang imong kaluoy, sumala sa imong saad ngadto sa imong mga sulugoon. (R)
Padangata kanako ang imong kaluoy aron ako mabuhi, kay ang imong balaod akong kalipay. (R)
Dili gayod ako mahikalimot sa imong mga sugo, kay pinaagi kanila gihatagan mo ako og kinabuhi. (R)
Imo ako; luwasa ako, kay gipangita ko ang imong kasugoan. (R)
PAGBASA SA SANTOS NGA EBANGHELYO SUMALA NI SAN LUKAS
Lk. 12:54-59
Si Jesus miingon ngadto sa katawhan, "Inigkakita ninyo og dag-om nga naggikan sa kasadpan, moingon dayon kamo, 'Moulan dili madugay' ug moulan gayod. Ug sa pagkamatngon ninyo sa habagat nga naghuros, moingon kamo, 'Moinit karon,' ug moinit gayod. Mga tigpakaaron-ingnon! Makamao kamong musabot sa kahulugan sa dagway sa yuta ug sa langit, apan nganong dili man kamo makasabot sa kahulugan niining panahona?" "Ug nganong dili man kamo maghukom unsay angay buhaton? Kon may mokiha kanimo, paningkamot sa pagpakig-uli kaniya samtang anaa pa kamo sa dalan, aron dili ka niya taralon ngadto sa maghuhukom ug itugyan ka niya ngadto sa polis, ug ibalhog ka sa polis ngadto sa bilanggoan. Timan-i kini: dili ka gayod buhian hangtod kabayran mo ang katapusang usa ka dako sa imong multa."
ANG EBANGHELYO SA GINOO.
DAYGON IKAW, O KRISTO.
