PAGBASA GIKAN SA SULAT NI SAN PABLO NGADTO SA TAGA-ROMA
Rom. 6:12-18
Ayaw na paharia ang sala diha sa inyong mga lawas nga may kamatayon, ug ayaw na padaog sa inyong kailibgon. Ayaw usab ninyo itugyan ang bisan unsang bahin sa inyong lawas aron gamiton sa pagkasala. Hinonoa, itugyan sa Dios ang inyong kaugalingon ingon nga mga patay na apan gibanhaw, ug itugyan ang inyong kaugalingon ngadto sa Dios aron gamiton alang sa katuyoan nga matarong. Kay kinahanglan nga dili na kamo magpaulipon sa sala, sanglit dili na man kamo ilalom sa balaod kondili anaa na sa grasya sa Dios. Nan, unsa man? Magpakasala ba diay kita tungod kay dili na man kita ilalom sa balaod kondili anaa na sa grasya sa Dios? Dili! Nasayran ninyo nga kon magpaulipon kamo ni bisan kinsa, ulipon kamo niya; kon nag-alagad kamo sa sala, ulipon kamo sa sala ug mosangpot kini sa kamatayon. Kon magmasinugtanon kamo sa Dios, iya kamong himoong matarong. Apan salamat sa Dios nga kamong naulipon kaniadto sa sala, naulipon na karon sa mga pagtulon-an nga nadawat ninyo. Giluwas kamo gikan sa sala ug nangahimo nang mga ulipon sa pagkamatarong.
ANG PULONG SA GINOO.
SALAMAT SA DIOS.
SALMO RESPONSORYO
Ps. 124:1-3, 4-6, 7-8
R. Ang atong hinabang anaa sa ngalan sa Ginoo.
Kon wala pa makig-uban ang Ginoo kanato, pasultiha ang Israel, kon wala pa makig-uban ang Ginoo kanato-diha nga misukol ang mga tawo batok kanato, ila unta kitang gilamoy nga buhi. Diha nga ang ilang kapungot nahaling batok kanato. (R)
Unya malumsan unta kita sa katubigan; mabanlas unta kita sa masulog nga sapa; lapaw kanato maharos unta kita sa makalilisang nga katubigan. Daygon ang Ginoo, kay wala kita niya biya-i nga usa ka tukbonon sa ilang mga ngipon. (R)
Giluwas kita ingog usa ka langgam gikan sa lit-ag sa mga mangangayam; nalugti ang lit-ag, ug nakalingkawas kita. Ang atong hinabang anaa sa ngalan sa Ginoo, nga nagbuhat sa langit ug sa yuta. (R)
PAGBASA SA SANTOS NGA EBANGHELYO SUMALA NI SAN LUKAS
Lk. 12:39-48
Si Jesus miingon sa iyang mga tinun-an: "Timan-i kini: kon nahibalo pa ang tagbalay kanus-a moabot ang kawatan, dili gayod siya motugot nga lungkabon sa kawatan ang iyang balay. Busa kamo usab kinahanglan mangandam, kay ang Anak sa Tawo moabot sa takna nga wala ninyo siya paabota." Unya miingon si Pedro, "Ginoo, nagsugilon ka ba niining sambingaya alang kanamo lamang, o gitumong mo ba kini alang sa tanan?" Ang Ginoo mitubag, "Kinsa ba diay ang buotan ug maalamon nga sulugoon? Siya ang tugyanan sa iyang agalon pagdumala sa panimalay ug paghatag sa ubang mga sulugoon sa ilang pahat sa kalan-on sa husto nga panahon. Bulahan kadtong sulugoon nga makaplagan sa iyang agalon nga nagtuman niini sa paghiuli niya. Sultihan ko kamo: ang agalon maghimo niadtong maong sulugoon nga tinugyanan sa tanan niyang katigayonan. Apan kon kadtong maong sulugoon moingon sa iyang kaugalingon, 'Dugay pa moabot ang akong agalon,' ug unya mosugod siya pagpamunal sa kauban niyang mga sulugoon nga lalaki ug babaye, ug magpalabig kaon ug inom ug maghubog-hubog, ug unya mahibalik ang agalon usa niana ka adlaw nga ang sulugoon wala magpaabot kaniya, ug sa panahon nga wala niya hibalo-i, tagud-taguron siya sa iyang agalon ug pahiagomon sa gidangatan sa ubang ligoy nga sulugoon." "Ang sulugoon nga nasayod unsa ang buot ipabuhat kaniya sa iyang agalon, apan dili mag-andam ug dili magtuman sa ipabuhat, silotan sa daghang latos; apan ang sulugoon nga wala masayod unsa ang gusto sa iyang agalon, ug makabuhat og butang nga tungod niini angay siyang latuson, silotan sa diriyot nga latos. Ang tawo nga gihatagag daghan, paninglag daghan; apan ang gihatagag daghan pa gayod, paninglan usab og mas daghan pa."
ANG EBANGHELYO SA GINOO.
DAYGON IKAW, O KRISTO.