PAGBASA GIKAN SA SULAT NI SAN PABLO NGADTO SA TAGA-ROMA
Rom. 4:20-25
Si Abraham wala gayod kawad-ig pagtoo ni nagduha-duha nga matuman gayod ang gisaad sa Dios kaniya; kay naghatag kaniyag gahom ang iyang pagtoo, ug busa gidayeg niya ang Dios. Kay nasiguro gayod niya nga tumanon sa Dios ang iyang gisaad. Busa si Abraham "gimatarong sa Dios" gumikan sa iyang pagtoo. Ang pulong "gimatarong siya" wala isulat alang lamang kaniya. Gisulat kini alang usab kanato nga himoong matarong, kay nagtoo man kita kaniya nga nagbanhaw kang Jesus nga atong Ginoo. Gitugyan siya aron patyon tungod sa atong mga sala, ug gibanhaw siya aron himoon kita niyang matarong.
ANG PULONG SA GINOO.
SALAMAT SA DIOS.
SALMO RESPONSORYO
Lk. 1:69-70, 71-72, 73-75
R. Daygon ang Ginoong Dios ni Israel, kay iyang giduaw ang iyang lungsod.
Lyang gibayaw ang gahom sa makaluluwas nga kusog alang kanato diha sa balay ni David iyang sulugoon, sumala sa iyang gisaad pinaagi sa mga baba sa iyang mga balaan, sa mga propeta sa miaging mga panahon. (R)
Kaluwasan sa atong mga kaaway ug sa mga kamot sa tanan natong mga kaatbang. Naluoy siya sa atong mga katigulangan ug nahinumdom sa balaan nga kasabutan nga iyang gipasiugdahan. (R)
Ang panumpa nga iyang gihimo kang Abraham atong amahan nga iyang ihatag kanato: nga human maluwas sa kahadlok ug malingkawas gikan sa kaaway, mag-alagad kita kaniya mga mahigugmaon sa tanang mga adlaw sa atong kinabuhi ug magbalaan diha sa iyang atubangan. (R)
PAGBASA SA SANTOS NGA EBANGHELYO SUMALA NI SAN LUKAS
Lk. 12:13-21
Unya may usa ka tawo didto sa pundok nga miingon kaniya, "Magtutudlo, sultihi ang akong igsuon nga bahinan unta ako niya sa katigayonan nga gibilin kanamo sa among amahan." Si Jesus mitubag kaniya, "Ondo, kinsa may naghatag kanakog katungod sa paghusay o pagbahin sa katigayonan tali kaninyong duha?" Ug mipadayon siya pagsulti kanilang tanan, "Pagbantay kamo ug likayi ninyo ang bisan unsang kahakog, kay ang tinuod nga kinabuhi sa tawo wala diha sa mga butang nga iyang gihuptan, bisan unsa pa siya kadato." Unya misugilon si Jesus kanila niining sambingaya: "Dihay usa ka dato nga may yuta nga maayog abot. Namalandong siya, 'Wala na akoy kabutangan sa tanang kong abot. Unsa may angay kong buhaton? Ah, kini mao ang akong buhaton,' miingon siya sa iyang kaugalingon; 'gub-on ko ang akong kamalig ug magtukod ako og labi pang dako, diin akong tigumon unya ang abot ug ang uban kong mga kabtangan. Unya moingon ako sa akong kaugalingon: Pagkapalaran nimo, Ondo! Anaa na kanimo ang tanang mga butang nga imong gikinahanglan alang sa daghang katuigan. Pagpahayahay na lang, kaon, inom, ug paglipay!' Apan ang Dios miingon kaniya, 'Oy, buang! Niini gayong gabhiona ikaw mamatay; unya kinsa may makapanag-iya nianang tanang butang nga imong gitigom alang sa imong kaugalingon?'" Ug mitapos si Jesus pag-ingon, "Mao kini ang mahitabo kanila nga magtigom og mga bahandi alang sa ilang kaugalingon apan dili dato sa atubangan sa Dios."
ANG EBANGHELYO SA GINOO.
DAYGON IKAW, O KRISTO.
