PAGBASA GIKAN SA BASAHON SA EXODO
Ex. 17:8-13
Misulong ang mga Amalekanhon sa mga Israelita didto sa Repidim. Si Moises miingon kang Josue, "Pagpilig pipila ka tawo ug pakig-away kamo ugma sa mga Amalekanhon. Magbarog ako sa tumoy sa bungtod nga maggunit sa sungkod nga gihatag sa Dios kanako." Gituman ni Josue ang gisugo ni Moises kaniya ug nakig-away sila sa mga Amalekanhon, samtang si Moises, si Aaron ug si Hur miadto sa tumoy sa bungtod. Samtang giisa pa ni Moises ang iyang mga bukton, nagpadayon ang pagdaog sa mga Israelita, apan kon ipaubos niya ang iyang mga bukton modaog usab ang mga Amalekanhon. Sa dihang gikapuyan na ang mga bukton ni Moises, si Aaron ug si Hur nagkuhag bato aron palingkoran ni Moises. Milingkod si Moises samtang si Aaron ug si Hur nagbarog tupad kaniya aron pagsagang sa iyang mga bukton. Gigunitan nila kini hangtod sa pagsalop sa adlaw, ug gibuntog ni Josue sa hingpit ang mga Amalekanhon.
ANG PULONG SA GINOO.
SALAMAT SA DIOS.
SALMO RESPONSORYO
Ps. 121:1-2, 3-4, 5-6, 7-8
R. Ang atong hinabang gikan sa Ginoo nga nagabuhat sa langit ug sa yuta.
Giyahat ko ang akong mga mata ngadto sa kabukiran; asa man maggikan ang hinabang alang kanato? Ang akong hinabang gikan sa Ginoo, nga nagbuhat sa langit ug sa yuta. (R)
Dili unta siya motugot nga ikaw madakin-as dili unta siya makatagpilaw nga nagabantay kanimo. Sa tinuoray wala siya matagpilaw ni matulog, ang magbalantay sa Israel. (R)
Ang Ginoo mao ang imong magbalantay; ang Ginoo mao ang imong panalipod; tupad siya kanimo sa imong kamot nga tuo. Ang adlaw dili makadaut kanimo sa adlaw, ni ang bulan sa gabii. (R)
Ang Ginoo magbantay kanimo sa tanang dautan; magbantay siya sa imong kinabuhi. Ang Ginoo magbantay sa imong pag-abot ug sa imong paggikan, karon ug hangtod sa kahangturan. (R)
PAGBASA GIKAN SA IKADUHANG SULAT NI SAN PABLO NGADTO KANG TIMOTEO
2 Tm. 3:14-4:2
Apan ikaw, pabilin diha sa mga kamatuoran nga gitudlo ko kanimo ug hugot mong gituohan. Kay nakaila ka man sa nagtudlo kanimo niini, ug nasayod ka nga sukad pa sa imong pagkabata nagbasa ka na sa Balaang Kasulatan nga arang makahatap kanimog kaalam nga maghatod ngadto sa kaluwasan pinaagi sa pagtuo kang Kristo Jesus. Ang tibuok Kasulatan gisulat uban sa lamdag gikan sa Dios ug mapuslanon kini alang sa pagtudlo sa kamatuoran, sa pagbadlong, sa pagsaway, ug sa pagtudlo unsaon pagkinabuhig matarong, aron ang nag-alagad sa Dios masangkap pag-ayo ug maandam sa tanang maayong buhat. Awhagon ko ikaw atubangan sa Dios ug ni Kristo Jesus nga maoy maghukom sa tanang tawo, buhi kon patay, nga tungod kay mobalik man siya ug tungod sa iyang Gingharian, pagkugi kanunay pagwali sa mensahe. Daniha, badlonga, dasiga ug tudlo-i nga mapailubon ang mga tawo.
ANG PULONG SA GINOO.
SALAMAT SA DIOS.
PAGBASA SA SANTOS NGA EBANGHELYO SUMALA NI SAN LUKAS
Lk. 18:1-8
Unya gisugilon ni Jesus kining sambingaya aron pagtudlo nga kinahanglan sila mag-ampo ug dili gayod nila wad-on ang paglaum. "Sa usa ka lungsod dihay usa ka huwes nga walay kahadlok sa Dios ni pagtahod sa mga tawo. Ug may usa ka biyuda niadtong lungsora nga nagbalikbalik pag-adto kaniya aron paghangyo nga panalipdan ang iyang katungod; nagkanayon siya, 'Tabangi intawon ako batok sa akong kaatbang.' Sulod sa taas nga panahon ang maghuhukom midumili pagtabang, apan sa katapusan miingon siya sa iyang kaugalingon, 'Bisan tuod wala akoy kahadlok sa Dios ni pagtahod sa mga tawo, apan tungod kay nagsamok man kanako kining maong biyuda, paningkamotan ko nga kapanalipdan ang iyang katungod; kay kon dili ko kini buhaton magsigi siyag balikbalik hangtod nga kaopsan akog pailob!'" Ug mipadayon ang Ginoo, "Pamati-a ninyo ang gisulti niadtong dautang huwes. Karon, dili ba ang Dios maghukom dapig sa iyang kaugalingong katawhan nga nagpakitabang kaniya sa adlaw ug sa gabi? Maglangan ba siya sa pagtabang kanila? Sultihan ko kamo nga maghukom siya dapig kanila, ug dalion niya ang pagbuhat niini. Apan makakaplag ba kaha og pagtuo ang Anak sa Tawo dinhi sa kalibutan sa iya unyang pag-abot?"
ANG EBANGHELYO SA GINOO.
DAYGON IKAW, O KRISTO.
