PAGBASA GIKAN SA SULAT NI SAN PABLO NGADTO SA TAGA-ROMA
Rom. 3:21-30
Mga igsuon: Karon gipadayag sa Dios ang iyang paagi sa paghimong matarong sa mga tawo, ug kini dili pinaagi sa balaod. Gimatud-an kini sa Balaod ug sa mga propeta. Gihimong matarong sa Dios ang mga tawo pinaagi sa ilang pagtuo kang Jesukristo. Gibuhat kini sa Dios sa tanan nga nagtuo kang Kristo kay managsama man ang mga tawo. Nakasala ang tanan ug nahilayo sa Dios. Apan pinaagi sa grasya sa Dios mahimo silang matarong pinaagi kang Kristo Jesus nga nagluwas kanila. Gihatag siya sa Dios aron pinaagi sa iyang kamatayon mapasaylo ang mga sala sa motuo kaniya. Niining paagiha gipakita sa Dios ang iyang hustisya bahin sa mga sala nga kaniadto wala niya tagda, apan karon gitagad na niya ang mga sala sa mga tawo aron pagpakita nga siya matarong, ug himoon niyang matarong ang tanan nga motuo kang Jesus. Nan, karon unsa may angay tang ipanghambog? Wala! Ngano man? Tungod ba kay ang tawo nagtuman sa Balaod? Dili, kondili tungod sa iyang pagtuo. Kay sa gingon ko na, ang tawo himoong matarong sa Dios pinaagi lamang sa pagtuo, ug dili sa pagtuman sa Balaod. O Dios ba lamang diay siya sa mga Judio? Dili ba usab siya Dios man sa mga dili Judio? Matuod nga siya Dios usab nila. Sanglit usa ra man ang Dios, ug himoon niyang matarong ang mga Judio pinasikad sa ilang pagtuo ug ang mga dili Judio himoon niyang matarong pinaagi usab sa ilang pagtuo.
ANG PULONG SA GINOO.
SALAMAT SA DIOS.
SALMO RESPONSORYO
Ps. 130:1-2, 3-4, 5-6
R. Diha sa Ginoo anaa ang kaluoy, ug ang kapuno sa kaluwasan.
Gikan sa kahiladman nagatuwaw ako kanimo, Ginoo; Ginoo, patalinghogi ang akong tingog. Abliha ang imong mga dunggan sa akong tingog nga nangamuyo. (R)
Kon ikaw, Ginoo, magtimaan sa mga kalapasan, Ginoo, kinsay makalahutay? Apan diha kanimo anaa ang pasaylo, aron ikaw pagatahuron. (R)
Nagasalig ako sa Ginoo; ang akong kalag nagasalig sa iyang pulong. Labaw sa mga gwardiya nga nagpaabot sa kaadlawon ang akong kalag nagapaabot sa Ginoo. (R)
PAGBASA SA SANTOS NGA EBANGHELYO SUMALA NI SAN LUKAS
Lk. 11:47-54
Si Jesus miingon, "Pagkaalaut ninyo! Nagbuhat kamo og nindot nga mga lubnganan alang sa mga propeta ang mga propeta nga gipatay sa inyong mga katigulangan. Sa ingon niini kamo mismo miangkon nga sa kamo miuyon sa inyong mga katigulangan; kay sila maoy nagpatay sa mga propeta ug kamo ang nagbuhat sa ilang mga lubnganan. Tungod niini ang Kaalam sa Dios nag-ingon, 'Padad-an ko silag mga propeta ug mga sinugo, ug ilang patyon ang uban ug ang uban ilang lutoson.' Busa silotan ang mga tawo niining panahona tungod sa ilang pagpatay sa tanang mga propeta sukad pa sa pagbuhat sa kalibutan, gikan sa pagbuno kang Abel ngadto sa pagbuno kang Zacarias, nga gipatay tungatunga sa halaran ug sa balaan nga dapit. Oo, sultihan ko kamo, silotan ang mga tawo niining panahona tungod kanilang tanan!" "Pagkaalaut ninyong mga magtutudlo sa Balaod! Gitipigan ninyo ang yawi nga maoy moabli sa pultahan sa balay sa kahibalo, apan kamo mismo dili mosulod ug gisanta ninyo ang buot mosulod niini!" Sa pagbiya ni Jesus niadtong dapita, gisaway siya pag-ayo sa mga magtutudlo sa Balaod ug sa mga Pariseo ug nangutana sila kaniya mahitungod sa daghang mga butang. Gisulayan nila siya paglit-ag aron hisakpan siya nga nasayop sa iyang gisulti.
ANG EBANGHELYO SA GINOO.
DAYGON IKAW, O KRISTO.
