PAGBASA GIKAN SA SULAT NI SAN PABLO NGADTO SA TAGA-ROMA
Rom. 2:1-11
Mga igsuon: Bisag kinsa ka pa, wala ka gayoy katarongan nga maghukom sa uban. Kay kon maghukom ka sa uban apan nagbuhat ka sa ilang gibuhat, gihukman mo ang imong kaugalingon. Nasayod kita nga matarong ang hukom sa Dios sa mga tawo nga nagbuhat niining mga butanga. Nagtuo ka ba nga makalingkawas ka sa silot sa Dios kon buhaton mo ang gibuhat sa uban nga imong gisaway? O giabusahan ba nimo ang iyang pagkamaluluy-on ug pagkamainantuson ug pagkamapailubon? Wala ka ba masayod nga gikaluy-an ka sa Dios aron ka maghinulsol? Apan gahi kag ulo! Busa gihimo mo ang kaugalingon mong silot nga labi pang dako unya sa Adlaw nga ipadayag ang kasuko ug matarong nga hukom sa Dios. Kay gantihan sa Dios ang tagsatagsa sumala sa iyang binuhatan. May mga tawo nga nagpadayon pagbuhat og maayo ug nagtinguha sa himaya, sa kadungganan, ug sa kinabuhing walay katapusan; hatagan sila sa Dios sa kinabuhing dayon. Apan ipahamtang sa Dios ang iyang kasuko ug kapungot sa mga tawo nga naghunahuna sa ilang kaugalingon ug nagsalikway sa kamatuoran aron pagbuhat sa dautan. Paantuson ug sakiton ang tanan nga nagbuhat og dautan, una ang mga Judio ug unya ang mga dili Judio. Apan hatagan sa Dios og himaya, dungog, ug kalinaw, ang tanang nagbuhat og maayo, una sa tanan, ang mga Judio ug unya ang mga dili Judio. Kay walay pinalabi ang Dios.
ANG PULONG SA GINOO.
SALAMAT SA DIOS.
SALMO RESPONSORYO
Ps. 62:2-3, 6-7, 9
R. Ginoo, gihatagan mo ang tagsa-tagsa ka tawo sumala sa iyang mga buhat.
Diha lamang sa Dios mipahulay ang akong kalag; gikan kaniya nagaabot ang akong kaluwasan. Siya lamang ang akong Bato ug akong kaluwasan, ang akong Kota; dili gayod ako masamok. (R)
Kalag ko, pahulay diha lamang sa Dios, kay gikan kaniya nagaabot ang akong kalauman. Siya lamang ang akong Bato ug akong kaluwasan, ang akong Kota; dili ako masamok. (R)
Salig kaniya sa tanang panahon, O katawhan ko, ablihi ang inyong mga kasingkasing sa iyang atubangan; ang Dios mao ang atong dalangpanan. (R)
PAGBASA SA SANTOS NGA EBANGHELYO SUMALA NI SAN LUKAS
Lk. 11:42-46
Si Jesus miingon, "Pagkaalaut ninyong mga Pariseo! Naghatag kamo ngadto sa Dios sa ikapulo ka bahin sa mga lamas, ingon sa herbabuyna ug kaningag ug uban pang utanon, apan nagpasagad kamo sa hustisya ug sa gugma sa Dios. Kining mga butanga kinahanglan inyong buhaton sa walay pagpasagad sa uban." "Pagkaalaut ninyong mga Pariseo! Gusto kamo sa espesyal nga mga lingkoranan sulod sa mga sinagoga, ug nga yukboan kamo didto sa mga merkado. Pagkaalaut gayod ninyo! Sama kamo sa mga lubong nga walay timaan, nga wala lamang hibalo-i sa mga tawo nga ila diay'ng gitamakan." Unya usa sa mga magtutudlo sa Balaod miingon kaniya, "Magtutudlo, sa pagsulti mo niini imo usab kaming gipakaulawan!" Si Jesus mitubag, "Pagkaalaut usab ninyong mga magtutudlo sa Balaod! Gipapas-an ninyo ang mga tawo og makabuktot nga palas-anon, apan kamo mismo dili gani mohikap niini bisan sa usa ka tudlo ninyo aron pagtabang kanila sa pagpas-an sa maong karga."
ANG EBANGHELYO SA GINOO.
DAYGON IKAW, O KRISTO.
