PAGBASA GIKAN SA SULAT NI SAN PABLO NGADTO SA TAGA-ROMA
Rom. 1:16-25
Mga igsuon: Dili ko ikaulaw ang ebanghelyo kay kini mao ang gahom sa Dios aron pagluwas sa tanan nga motuo, una sa tanan, sa mga Judio ingon man sa mga dili Judio. Kay gipadayag sa ebanghelyo ang paagi sa Dios sa paghimong matarong sa tawo, ug kini pinaagi sa pagtuo gikan sa sinugdan hangtod sa katapusan. Sumala sa Kasulatan, "Ang gimatarong sa Dios mabuhi pinaagi sa pagtuo." Gipadayag gikan sa langit ang kapungot sa Dios batok sa pagka dili diosnon ug sa pagkadautan sa mga tawo, kansang mangil-ad nga pagkinabuhi nagsanta sa kamatuoran. Ang masayran sa tawo bahin sa Dios gipadayag niya kanila sa klaro gayod. Ang Dios gayod maoy nagpatin-aw niini kanila. Sukad buhata sa Dios ang kalibutan, ang iyang dili makita nga mga kinaiya-ang iyang gahom nga walay katapusan ug ang iyang pagkadios, nakita nga klaro kaayo diha sa mga butang nga gibuhat sa Dios. Busa wala na silay ikabalibad. Nakaila sila sa Dios, apan wala nila siya pasidunggi ni pasalamati ingon nga Dios. Hinonoa, ang ilang mga gihunahuna pulos binuang Ug gi-ngitngitan ang ilang mga salabotan. Matod nila maalam sila, apan mga buangbuang diay; inay simbahon nila ang Dios nga walay kamatayon, nagsimba hinoon sila sa mga larawan nga gibuhat ingon sa dagway sa tawo, o sa mga langgam, o sa mga mananap, o sa mga hayop nga nanagkamang. Tungod kay ang mga tawo ingon man niini kabuang, gipasagdan sila sa Dios nga magbuhat sa malaw-ay'ng mga butang nga gitinguha sa ilang kasingkasing, ug gibuhat nila ngadto sa ilang isigkatawo ang salawayong mga butang. Gituis nila ang kamatuoran mahitungod sa Dios, ug gisimba ug gialagaran nila ang binuhat sa Dios inay ang Magbubuhat nga mao untay angay'ng daygon hangtod sa kahangturan! Amen.
ANG PULONG SA GINOO.
SALAMAT SA DIOS.
SALMO RESPONSORYO
Ps. 19:2-3, 4-5
R. Ang kalangitan nagasangyaw sa himaya sa Dios.
Ang kalangitan nagapahayag sa himaya sa Dios, ug ang kapanganuran nagsangyaw sa buhat sa iyang kamot. Ang matag-adlaw nag-asoy niini ngadto sa sunod adlaw, ug ang matag gabii ngadto sa sunod gabii. (R)
Walay sulti o pulong kansang tingog wala mabati; sa tibuok kalibutan nadungog ang ilang tingog, ug ngadto sa kinatumyan sa kalibutan, ang ilang mensahe. (R)
PAGBASA SA SANTOS NGA EBANGHELYO SUMALA NI SAN LUKAS
Lk. 1:37-41
Niadtong panahona sa nahuman na si Jesus og sulti, may usa ka Pariseo nga midapit kaniya sa pagpangaon; busa miadto siya ug nakigsalo kaniya. Natingala ang Pariseo sa pagkamatikod niya nga wala manghunaw si Jesus sa wala pa mokaon. Tungod niini miingon ang Ginoo kaniya, "Kamong mga Pariseo naghinlo sa gawas nga bahin sa tasa ug plato, apan sa sulod ninyo puno kamo sa panikas ug kadautan. Mga buang! Dili ba ang Dios nga maoy nagbuhat sa gawas nga bahin mao usab ang nagbuhat sa sulod? Apan ihatag ang anaa sa inyong mga tasa ug plato ngadto sa mga kabos, ug mamahinlo ang tanan alang kaninyo."
ANG EBANGHELYO SA GINOO.
DAYGON IKAW, O KRISTO.