PAGBASA GIKAN SA BASAHON NI PROPETA JONAS
Jon. 4:1-11
Wala malipay niini si Jonas ug nasuko siya. Busa nangutana siya sa Ginoo, "Dili ba giingnan ko na ikaw sa wala pa ako moanhi nga mao gayod kini ang buhaton mo? Mao man gani nga mikagiw unta ako ngadto sa España! Nahibalo ako nga ikaw Dios nga maluloy-on, mapailubon kanunay, ug andam pag-usab sa imong laraw. Busa patya na lang ako, Ginoo, kay mas maayo pa nga patay ako kay sa buhi." Ang Ginoo mitubag. "Angay ba nimo kining ikasuko?" Unya si Jonas milakaw ug miadto sa silangan sa siyudad ug milingkod didto. Unya nagbuhat siyag salimbong ug mipasilong niini, samtang nagpaabot siya unsay mahitabo sa Ninibe. Unya gipatubo sa Ginoong Dios ang usa ka tanom, aron hilandongan si Jonas. Nalipay pag-ayo si Jonas tungod sa tanom. Apan pagkaugma sa pagsubang sa adlaw, nagpadala ang Dios og ulod aron pagkutkot sa tanom, ug namatay kini. Ug sa pagkaudto-udto na, nagpadala ang Dios og hangin nga init gikan sa silangan, ug naluya si Jonas tungod sa kainit sa adlaw. Busa miingon siya, "Maayo pang mamatay ako kay sa magpabiling buhi." Apan mingon ang Dios kaniya, "Angay bang ikasuko mo ang nahitabo sa tanom?" Si Jonas mitubag, "Oo, angay gayod nga ikasuko ko kini!" Ang Ginoo miingon kaniya, "Mitubo kining tanoma sa usa ka gabii lamang ug nahanaw pagkaugma. Wala kay nahimo alang niini, dili ka maoy nagpatubo aron maluoy ka niini! Labi pa akong maluoy sa Ninibe, kanang dakong siyudad nga may kapin sa usa ug kawhaag duha ka libo ka kabataan nga inosente, walay labot sa daghang mga hayop!"
ANG PULONG SA GINOO.
SALAMAT SA DIOS.
SALMO RESPONSORYO
Ps. 86:3-4, 5-6, 9-10
R. Ginoo, malumo ikaw ug puno sa gugma.
Ikaw ang akong Dios; kaloy-i ako, O Ginoo, kay nagasangpit ako kanimo sa tibuok adlaw. Lipaya ang kalag sa imong sulugoon kay kanimo, O Ginoo, gibayaw ko ang akong kalag. (R)
Kay ikaw, O Ginoo, maayo ug mapasayloon tugob sa gugma kanilang tanan nga nagasangpit kanimo. Pamati, Ginoo, sa akong pangamuyo ug patalinghogi ang tingog sa akong pangilaba. (R)
Ang tanang mga nasod nga imong gibuhat moabot ug mosimba kanimo, O Ginoo, ug maghimaya sa imong ngalan. Kay ikaw dako, ug nagbuhat ka og katingalahang mga buhat; ikaw lamang ang Dios. (R)
PAGBASA SA SANTOS NGA EBANGHELYO SUMALA NI SAN LUKAS
Lk. 11:1-4
Usa niana ka higayon nag-ampo si Jesus didto sa usa ka dapit. Sa pagkahuman niyag ampo, miingon ang usa sa iyang mga tinun-an, "Ginoo, tudlo-i kami sa pag-ampo, ingon nga gitudloan ni Juan ang iyang mga tinun-an." Si Jesus miingon kanila, "Ingna ninyo niini pag-ampo: 'Amahan, Simbahon unta ang imong ngalan, maghari ka unta kanamo. Ihatag kanamo sa matag adlaw ang kalan-on nga among gikinahanglan. Ug pasayloa kami sa among mga sala. Kay nagpasaylo kami sa tanan nga nakasala kanamo; ug ayaw kami ibutang sa lisod nga pagsulay.'"
ANG EBANGHELYO SA GINOO.
DAYGON IKAW, O KRISTO.
