PAGBASA GIKAN SA BASAHON NI BARUC
Bar. 4:5-12, 27-29
Pagmaisog, katawhan ko, ikaw ang nagbuhi sa ngalan sa Israel. Gibaligya ikaw ngadto sa kanasuran nga dili Judio, apan wala ikaw malaglag. Tungod kay gisuko nimo ang Dios, gitugyan ikaw niya ngadto sa imong mga kaaway. Sa imong paghalad sa mga sakripisyo ngadto sa mga yawa inay ngadto sa Dios, gisuko nimo siya nga nagbuhat kanimo. Hikalimtan nimo ang diyos nga walay katapusan ug nagmatuto kanimo sa gamay'ng bata ka pa, ug busa naghatag kag kaguol sa Jerusalem, nga daw usa mo ka inahan. Ang Jerusalem nakakita nga ang Dios nagsilot kanimo tungod kay nasuko man siya, ug miingon siya ngadto sa tanang silingan nga mga siyudad, "Tan-awa ang dakong kaalaot nga gipahamtang sa Dios kanako. Nakakita ako sa akong mga anak nga lalaki ug mga anak nga babaye nga gibihag, usa ka pagbihag nga midangat kanila gikan sa Dios nga Walay Katapusan. Giamoma nako ang akong mga kabataan sa dako nga kalipay, apan naghilak ako ug nagbangotan sa diha nga gikuha sila kanako. Wala untay malipay sa akong mga kasakit karon nga ako usa ka biyuda ug tungod sa daghan nakong mga kabataan nga gisakmit gikan kanako. Mibiya sila sa Balaod sa Dios, ug ang ilang mga sala naghimo kanako nga usa ka siyudad nga biniyaan." "Pagmaisog, mga anak ko, ug singgit kamo ngadto sa Dios aron tabangan. Gisilotan kamo niya, apan dili siya mahikalimot kaninyo. Maingon nga kaniadto nahugot ang inyong hunahuna sa pagtalikod sa Dios, karon balik kamo ug alagari siya sa dugang nga napulo ka pilo nga kahugot. Siya nga nagpahamtang niining mga kasakit diha kaninyo magluwas kaninyo ug magdala kaninyo ngadto sa walay kinutoban nga kalipay."
ANG PULONG SA GINOO.
SALAMAT SA DIOS.
SALMO RESPONSORYO
Ps. 69:33-35, 36-37
R. Ang Ginoo mamati sa kabus.
"Tan-awa, kamong mga mapaubsanon, ug paglipay; kamo nga nangita sa Dios, magsadya unta ang inyong mga kasingkasing! Kay ang Ginoo mamati sa kabus ug sa mga iyaha nga gigapos dili siya motamay, ang langit ug ang yuta nagadayeg kaniya, ang kadagatan ug ang tanan nga nagalihok diha kanila." (R)
Ang Dios magluwas sa Sion ug magtukod pag-usab sa mga siyudad sa Juda. Magpuyo sila didto sa yuta ug manag-iya niini, ug ang mga kaliwat sa iyang mga sulugoon manunod niini, ug sila nga nahigugma sa iyang ngalan magpuyo niini. (R)
PAGBASA SA SANTOS NGA EBANGHELYO SUMALA NI SAN LUKAS
Lk. 10:17-24
Unya nahibalik ang kapitoag-duha nga malipayon kaayo ug miingon, "Ginoo, bisan ang mga yawa mipatuo kanamo sa among paghingilin kanila sa imong ngalan!" Si Jesus mitubag kanila, "Nakita ko si Satanas nga nahulog ingog kilat gikan sa langit. Pamati kamo! Gitagaan ko kamog gahom aron makahimo kamo pagyatak sa mga bitin ug sa mga tanga, ug sa tanang gahom sa Yawa, ug walay makaunsa kaninyo. Apan ayaw kamog kalipay tungod kay ang mga yawa mipatuo kaninyo, kondili paglipay hinoon kamo kay ang inyong mga ngalan nahisulat didto sa langit." Niadtong higayona gilipay si Jesus sa Espiritu Santo ug mingon siya, "Amahan, Ginoo sa langit ug sa yuta, nagpasalamat ako kanimo tungod kay gipadayag mo man ngadto sa mga walay kahibalo ang imong gililong sa mga makinaadmanon ug sa mga may kahibalo. Oo, Amahan, natuman kini kay mao may imong gusto ug pagbuot." "Ang akong Amahan mitugyan kanako sa tanang butang: walay nakaila sa Anak gawas sa Amahan, ug walay nakaila sa Amahan gawas sa Anak, ug kanila nga buot pailhon sa Anak kinsa ang Amahan!" Unya miatubang si Jesus sa mga tinun-an ug mingon kanila lamang, "Bulahan kamo nga nakakita sa mga butang nga inyong nakita! Kay sultihan ko kamo nga daghang mga propeta ug mga hari nga buot motan-aw sa inyong nakita apan wala makakita, ug buot mamati sa inyong nadungog apan wala makabati."
ANG EBANGHELYO SA GINOO.
DAYGON IKAW, O KRISTO.
