PAGBASA GIKAN SA BASAHON NI BARUC
Bar. 1:15-22
Mao kini ang sugid nga kinahanglan inyong himoon: "Ang Ginoo nga atong Dios matarong, tanang katawhan sa Juda, ang apan puno pa kita sa kaulaw. katawhan sa Jerusalem, ang atong mga hari, atong mga magmamando, atong mga pari, atong mga propeta ug ang atong mga katigulangan nahimutang sa kaulaw, tungod kay nakasala kita batok sa Ginoo nga atong Dios, ug nakasupak kaniya. Wala kita mamati kaniya ni nagkinabuhi kita subay sa iyang mga sugo. Sukad sa adlaw nga ang Ginoo nagpagula sa atong mga katigulangan gikan sa Ehipto hangtod karong mga adlawa, nagpadayon kita sa pagkamabudhion kaniya, Ug wala kita mag-ukon-ukon sa pagsukol kaniya. Kaniadto, sa diha nga ang Ginoo nagpagula sa atong mga katigulangan gikan sa Ehipto, aron ihatag niya kanato ang usa ka tabunok ug tambok nga yuta, nagbungat siya og mga tunglo batok kanato pinaagi sa iyang sulugoon nga si Moises. Ug karon nag-antos kita tungod niadtong mga tunglo. Nagdumili kita sa pagsugot sa pulong sa Ginoo nga atong Dios nga iyang gisulti kanato pinaagi sa mga propeta. Inay niana nagbuhat kitangtanan sumala sa atong gusto ug nagpadayon kita paglakat sa atong kaugalingong dautan nga mga dalan. Miatubang kita ngadto sa laing mga dios ug nagbuhat kita sa mga butang nga kontra sa Ginoo."
ANG PULONG SA GINOO.
SALAMAT SA DIOS.
SALMO RESPONSORYO
Ps. 79:1-2, 3-5, 8, 9
R. Tungod sa himaya sa imong ngalan, O Ginoo, luwasa kami.
O Dios, ang mga nasod miabot ngadto sa imong kabilin; ilang gipasipad-an ang imong balaang templo, ilang gigun-ob ang Jerusalem. Ilang gipanghatag ang mga patayng lawas sa imong mga sulugoon ingog kalan-on sa kalanggaman sa langit, ang unod sa imong buotang mga sulugoon ngadto sa mga mananap sa yuta. (R)
Gibubo nila ang ilang dugo daw tubig libot sa Jerusalem ug walay usa nga maglubong kanila. Nahimo kaming talamayon sa among mga silingan, giyam-iran ug gibugalbugalan sa nanaglibot kanamo. O Ginoo, hangtod kanus-a? Mapungot ka ba kanamo hangtod sa kahangturan? Modilaab ba ang imong kasilag ingog kalayo? (R)
Ayaw hinumdomi batok kanamo ang mga kalapasan sa nangaging panahon; moabot unta kanamo ang imong kaluoy sa walay langan, kay nabanlud kami sa kahiladman. (R)
Tabangi kami, O Dios among manluluwas, tungod sa himaya sa imong ngalan. Luwasa kami ug pasayloa ang among kasal-anan tungod sa imong ngalan. (R)
PAGBASA SA SANTOS NGA EBANGHELYO SUMALA NI SAN LUKAS
Lk. 10:13-16
Si Jesus miingon: "Pagkamakalilisang unya sa mahitabo kanimo, Corasin! Ug pagkamakalilisang usab sa mahitabo kanimo, Betsaida! Kay kon ang mga milagro nga nahimo diha kaninyo nangahimo pa didto sa Tiro ug sa Sidon, dugay na untang naghinulsol ang mga tawo didto ug nagpakita niini sa paglingkod nga nagsul-ob og bisting sako, ug nagblibod og abo sa ilang kaugalingon. Sa adlaw sa Paghukom ang Dios mas maluoy pa unya sa Tiro ug sa Sidon kay kaninyo. Ug mahitungod kanimo, Capernaum, buot mong ituboy ang imong kaugalingon hangtod sa langit, apan ibanlod ka hinoon ngadto sa impiyerno!" Unya miingon siya sa iyang mga tinun-an, "Ang mamati kaninyo, mamati kanako; ug ang magsalikway kaninyo, magsalikway kanako; ug ang magsalikway kanako, magsalikway kaniya nga nagsugo kanako."
ANG EBANGHELYO SA GINOO.
DAYGON IKAW, O KRISTO.
