PAGBASA GIKAN SA BASAHON NI NEHEMIAS
Neh. 8:1-12
Sa pag-abot sa ikapitong bulan, ang katawhan sa lsrael didto na sa ilang tagsatagsa ka lungsod. Sa unang adlaw nianang bulana nagkatigom silang tanan didto sa Jerusalem, sa plasa sulod sa ganghaan nga ginganlag Ganghaan sa Tubig. Giingnan nila si Esdras, ang pari ug batid sa Balaod, sa pagdala sa basahon sa Balaod nga gihatag sa Ginoo ngadto sa lsrael pinaagi kang Moises. Busa gidala ni Esdras ang basahon atubangan sa katawhan nga nagkatigom mga lalaki, mga babaye ug mga kabataan nga may igo nang panabot. Ug gibasa niya kini diha sa ilang atubangan didto sa plasa ug namati sila pag-ayo. Si Esdras nagbarog sa platapormang kahoy nga ilang gihimo alang niining katuyoan ug tupad kaniya nagtindog si Matatias, si Semaya, si Anaias, si Urias, si Hilkias, ug si Maasias diha sa iyang tuo; ug dapit sa iyang wala diha si Pedaias, si Misael, si Melquias, si Hasum, si Hasbadana, si Zacarias, ug si Mesolam. Giablihan ni Esdras ang basahon sa Balaod atubangan sa tanang tawo; ug sa pag-abli niya niini, nanindog ang tanan. Ug gidayeg ni Esdras ang Ginoo, ang gamhanang Dios, ug ang katawhan mitubag, "Amen, Amen," pinataas ang ilang mga kamot; ug giduko nila ang ilang ulo ug gisimba nila ang Ginoo uban sa dakong pagtahod. Mitabang pagpasabot sa katawhan bahin sa Balaod sila si Josue, si Bani, si Serebias, si Jamin, si Acub, si Sabetai, si Odias, si Maasias, si Kelita, si Azarias, si Josabed, si Hanan, si Falaya, sila mga Levita. Gihimo nila kini samtang ang mga tawo nagpabilin sa ilang gibarogan. Mihatag silag binaba nga hubad sa Balaod sa Dios, ug gipasabot kini aron ang mga tawo makasabot niini. Nanghilak ang katawhan sa pagkabati nila sa Balaod, Busa si Nehemias nga maoy gobernador, ug si Esdras ang pari ug batid sa Balaod, Ug ang mga Levita nga nagtudlo sa mga tawo, miingon, "Balaan kining adlawa alang sa Ginoo nga atong Dios, ayaw kamo kasubo ni maghilak." Unya miingon siya kanila, "Padayon sa inyong batasan, kan-a ninyo ang lamiang pagkaon, ug imna ninyo ang tam-is nga bino, ug padad-i ninyog diyotay'ng bahin kadtong walay makaon kay balaan kining adlawa alang sa Ginoo. Ayaw kamog kaguol, kay ang kalipay nga gikan sa Ginoo maoy inyong kalig-on." Busa gipahilom sa mga Levita ang tanang tawo. Sila miingon, "Hilom kamo kay balaan kining adlawa, ayaw kamo pagsubo." Ug ang tanang mga tawo nangaon ug nanginom ug gibahinan nila ang walay pagkaon; nagmaya sila kay nasabot man nila ang mga pulong nga gisulti kanila.
ANG PULONG SA GINOO.
SALAMAT SA DIOS.
SALMO RESPONSORYO
Ps. 19:8, 9, 10, 11
R. Ang mga sugo sa Ginoo nagahatag og kalipay sa kasingkasing.
Ang balaod sa Ginoo hingpit, nagalipay sa kalag. Ang kasugoan sa Ginoo kasaligan, nagahatag og kinaadman sa tawo nga yano. (R)
Ang mga sugo sa Ginoo matarong nagalipay sa kasingkasing. Ang sugo sa Ginoo matin-aw, nagahatag og kahayag sa mata. (R)
Ang kahadlok sa Ginoo putli, nagalungtad sa kahangturan. Ang mga gimbut-an sa Ginoo matuod, silang tanan matarong. (R)
Labaw sila kabililhon kay sa bulawan, kay sa usa ka pudyot sa labing ulay nga bulawan. Mas matam-is usab kay sa anibal o dugos nga gikan sa kaba. (R)
PAGBASA SA SANTOS NGA EBANGHELYO SUMALA NI SAN MATEO
Mt. 18:1-5, 10
Niadtong higayona ang mga tinun-an nangadto kang Jesus ug nangutana, "Kinsa man ang labing dako sa Gingharian sa Langit?" Si Jesus mitawag og usa ka bata ug gipatindog niya sa atubangan nila, ug miingon siya, "Hinumdomi kini: gawas kon mausab kamo ug mahimong sama sa mga bata, dili gayod kamo makasulod sa Gingharian sa Langit. Ang labing dako sa Gingaharian sa Langit mao ang magpaubos sa iyang kaugalingon ug magpakasama niining bataa. Ug ang magadawat og usa ka bata nga sama niini sa akong ngalan, magdawat kanako." "Matngoni ninyo nga dili kamo magtamay bisag usa niining mga gagmay'ng bata. Kay sultihan ko kamo nga ang ilang mga anghel atua kanunay sa atubangan sa akong Amahan didto sa langit."
ANG EBANGHELYO SA GINOO.
DAYGON IKAW, O KRISTO.
