PAGBASA GIKAN SA BASAHON NI NEHEMIAS
Neh. 2:1-8
Sa bulan sa Nisan, sa ikakawhaan ka tuig sa paghari ni Artajerjes, samtang gitagayan ko siyag bino nakita niya nga subo ang akong panagway. Busa giingnan ako sa hari, "Nganong subo man ang imong panagway nga dili ka man unta masakiton? Unsa may gikasub-an mo?" Busa nahadlok ako pag-ayo, ug gitubag ko ang hari, "Hatagan ka unta, O Kamahalan, og taas nga kinabuhi! Nasubo ako kay ang siyudad diin ilubong ang akong katigulangan nagun-ob na ug nasunog ang mga ganghaan niini?" Unya giingnan ako sa hari, "Unsay buot mong ihangyo kanako?" Busa nag-ampo ako sa Dios nga anaa sa langit. Ug giingnan ko ang hari, "Kon mouyon ka, Kamahalan, ug kon malooy ka kanako, tugoti ako sa pag-adto sa Juda, sa siyudad nga gilubngan sa akong katigulangan, aron ako kining tukoron pag-usab." Ug mingon ang hari (samtang diha sa tupad kaniya ang rayna), "Magdugay ka ba didto, ug kanus-a ka man mobalik dinhi?" Busa miuyon ang hari nga mopauli ako sa Juda ug gitagalan ko siya kon kanus-a ako mobalik. Ug gihangyo ko ang hari nga kon mahimo magsulat unta siya ngadto sa mga kadagkoan sa lalawigan sa Tabok-sa-Suba-sa-Eufrates aron tugotan ako nila pag-agi ngadto sa Juda. Gihangyo ko usab ang hari nga sulatan usab niya si Asaf, ang magbalantay sa iyang lasang aron hatagan ako niyag mga kahoy nga magamit ko alang sa ganghaan sa templo, sa pagkoral sa siyudad ug pagtukod ug balay nga akong kapuy-an. Ug gitugot sa hari ang akong gihangyo kaniya, kay nag-uban man ang Dios kanako.
ANG PULONG SA GINOO.
SALAMAT SA DIOS.
SALMO RESPONSORYO
Ps. 137:1-2, 3, 4-5, 6
R. Dili unta makasulti ang akong dila, kon ugaling hikalimtan ko ikaw.
Sa daplin sa mga suba sa Babilonia nagalingkod kami ug nagahilak, sa among paghinumdom sa Sion. Didto sa mga kahoy niadtong yutaa gisab-ong namo ang among mga alpa. (R)
Bisan ang mga mananakop kanamo naghangyo nga bungaton namo ang mga titik sa among mga awit ug ang mamimihag kanamo nag-awhag kanamo nga maglipay; "Awiti kami sa mga awit sa Sion." (R)
Unsaon man namo pag-awit sa usa ka awit sa Ginoo diha sa yuta nga langyaw? Kon hikalimtan ko ikaw, O Jerusalem, hikalimtan unta ang akong tuong kamot. (R)
Motapot unta ang akong dila sa akong alingagngag kon dili ako mahinumdom kanimo, kon dili ko palabihon ang Jerusalem labaw sa akong kalipay. (R)
PAGBASA SA SANTOS NGA EBANGHELYO SUMALA NI SAN LUKAS
Lk. 9:57-62
Samtang naglakaw sila, may usa ka tawo nga miingon kang Jesus, "Mosunod ako kanimo bisan asa ka moadto." Si Jesus miingon kaniya, "Ang mga milo may tagoanan, ug ang mga langgam may mga salag, apan walay kahigdaan ug kapahulayan ang Anak sa Tawo." Ug miingon siya sa laing tawo, "Sunod kanako." Apan miingon ang tawo, "Sir, mouli una ako aron paglubong sa akong amahan." Si Jesus mitubag, "Pasagdi ang mga patay nga maglubong sa ilang mga minatay. Apan ikaw, lakaw iwali ang Gingharian sa Dios." May laing tawo usab miingon, "Mosunod ako kanimo, Sir, apan tugoti una ako pagpauli aron pagpanamilit sa akong banay." Si Jesus miingon kaniya, "Kinsa gani kadtong mosugod pagdaro ug unya magpunay'g lingi dili angay sa Gingharian sa Dios."
ANG EBANGHELYO SA GINOO.
DAYGON IKAW, O KRISTO.
